भारतले अतिक्रमण गरेको भूमिलाई समेटेर नेपालले नयाँ नक्सा जारी गरी औपचारिक प्रयोगमा ल्याउन थालेपछि भारतीय प्रधानमन्त्री नरेन्द्र मोदीले सुरक्षा निकायहरूसँग औपचारिक छलफल थालेका छन् । नेपाली भूमि मिचिएको विषयमा वार्ताका लागि नेपाल सरकारले पटक‑पटक लिखित र मौखिक आग्रह गर्दा पनि बेवास्ता गरेका मोदीले मंगलबार सीमा क्षेत्रका विषयमा छलफल अघि बढाएको भारतीय सञ्चारमाध्यमले बताएका छन् ।

मोदीले मंगलबार राष्ट्रिय सुरक्षा सल्लाहकार (एनएसए) अजित डोभल, चिफ अफ डिफेन्स स्टाफ (सिडिएस) जनरल विपिन रावतलगायतसँग सीमा क्षेत्रका विषयमा बढेको विवादबारे छलफल गरेका हुन् । भारतीय सञ्चारमाध्यमले चीनको लद्दाखका विषयमा केन्द्रित भएर छलफल चलाएको दाबी गरे पनि दुवै देशसँगको सीमाका विषयमा मोदीले छलफल गरेको बुझिएको छ ।

एनएसए, सिडिएसलगायतसँगको छलफलमा मोदीले चीनसँगका विवादित सीमा क्षेत्र र नेपालको अतिक्रमित भूमिमा पूर्वाधार निर्माणका कामलाई वार्ता अघि बढे वा नबढे पनि निरन्तरता दिने बताएका थिए । नेपाल र चीनका रणनीतिक क्षेत्रहरूमा भारतले बनाइरहेका पूर्वाधारलाई निरन्तरता दिने विषयमा छलफल केन्द्रित भएको सरकारी स्रोतलाई उद्धृत गर्दै भारतीय सञ्चारमाध्यमले जनाएका छन् ।

छलफलमा नेपाल, चीन, पाकिस्तान, बंगलादेशलगायतसँगको सीमा विवादबाट कुरा भएको थियो । भारतको सबै छिमेकी देशहरूसँग सीमाका विषयमा विवाद छ । भारतको विस्तारवादी यही नीतिका कारण छिमेकी देशहरूसँग शत्रुता र कटुत बढिरहेको भन्दै भारतीयहरूले वार्ताका माध्यमबाट समस्या समाधानका लागि मोदीलाई आग्रह गरिरहेका छन् । तर, सीमा विवादभन्दा पनि अतिक्रमण गर्दै अघि बढेको भारतले वार्ताबाट कहिल्यै समाधानको पहल गर्ने गरेको छैन । वार्ताबाट समाधानको पहल खोज्दा पछि हट्नुपर्ने भएकाले भारतले बलमिच्याइँ गरिरहेको स्वयं भारतीय अधिकारीहरूले विभिन्न फोरममा बताउने गरेका छन् ।

सञ्चारमाध्यममा जनाइएअनुसार छलफलमा राष्ट्रिय सुरक्षा सल्लाहकार डोभलले लद्दाख, उत्तरी सिक्किम र उत्तराखण्डका पूर्वाधार निर्माणको अवस्थाका साथै नेपाल र चीनका गतिविधिबारे प्रधानमन्त्री मोदीलाई जानकारी गराएका थिए । भारतले नेपालको पश्चिमी सीमा लिपुलेक, लिम्पियाधुरा र कालापानी अतिक्रमण गरेको सडक निर्माण गरिरहेको छ । सो क्षेत्र भारतको उत्तराखण्ड प्रदेशसँग जोडिएको छ ।

लद्दाख क्षेत्रमा चीनले करिब ५ हजार जनमुक्ति सेना खटाएपछि भारतले पनि सीमा रक्षाका लागि सैनिक संख्या बढाएको छ । सिक्किमको सीमा क्षेत्र, लद्दाख र उत्तराखण्डमा भारत र चीनबीच टकरावको स्थिति आएको छ । सोमबार चिनियाँ सेनाले ढुंगामुढा गरेको भारतीय पक्षले आरोप लगाएको थियो ।

त्यसअघि मे ५ र ६ मा गलवान क्षेत्रमा चिनियाँ र भारतीय सेनाबीच हात हालाहाल नै भएको थियो । त्यसपछि नै लद्दाखमा चिनियाँ जनमुक्ति सेनाले हवाई अड्डा विस्तार गरेको थियो । मंगलबारको विशेष छलफलमा रक्षामन्त्री राजनाथ सिंह, सेना प्रमुख एमएम नरभानेलगायतको पनि सहभागिता थियो ।

प्रकाशित समय १०:२५ बजे