विश्वभर नोवेल कोरोनाभाइरस (कोभिड १९) संक्रमित ५७ प्रतिशत मानिस ठिक भएका छन् । मंगलबार बिहानसम्ममा १ करोड १७ लाख ३९ हजार १६७ मानिसमा कोरोना संक्रमण फेला परेकोमा ६६ लाख ४१ हजार ८६४ जना निको भएर घर फर्किएका हुन् । यो कुल संक्रमितको ५६.५८ प्रतिशत हो ।

चैत १६ गतेसम्म कुल कोरोना संक्रमितमध्ये २१.३७ प्रतिशतमात्र निको भइरहेकोमा असार २३ सम्म आइपुग्दा निको हुने दर ५४.३९ प्रतिशतमा आइपुगेको हो ।

कोभिड १९ संक्रमितको मृत्युदर पनि घट्दै गएको छ । मंगलबार बिहानसम्ममा विश्वभर संक्रमित भएकामध्ये पाँच लाख ४० हजार ६६० मानिसको मृत्यु भएको छ । यो कुल संक्रमितको ४.६१ प्रतिशत हो । मध्य वैशाखमा कोरोनाबाट मृत्यु हुने दर करिब ७ प्रतिशत थियो ।

बितेका २४ घण्टामा एक लाख ७१ हजार ५०८ संक्रमित थपिएका छन् । अमेरिकामा ५० हजार, भारतमा २२ हजार र ब्राजिलमा २१ हजार संक्रमित थपिएका हुन् । यससँगै अमेरिकामा कुल संक्रमित संख्या ३० लाख ४० हजार, ब्राजिलमा १६ लाख २६ हजार र भारतमा ७ लाख २० हजार नाघेको छ ।

अमेरिकमा ४३.५७ प्रतिशत मानिस कोरोनाभाइरसमुक्त भएका छन् । त्यस्तै ब्राजिलमा ६०.१८, भारतमा ६१.१ र रुसमा ६६.०४ प्रतिशत मानिस कोरोनामुक्त भएका छन् । त्यस्तै अमेरिकामा मृत्युदर ४.३७ प्रतिशत छ । ब्राजिलमा ४.०३, भारतमा २.८ र रुसमा १.५ प्रतिशत मृत्युदर छ । पुस १५ गते चीनको वुहानमा पहिलत्रपटक फेला परेको कोभिड १९ विश्वका सबै देश र भूगोलमा फैलिसकेको छ भने कतिपय देश कोरोनामुक्त पनि भइसकेका छन् ।

नेपालमा के छ ?

नेपालमा कोभिड १९ परीक्षण निकै सुस्त छ । सरकारले परीक्षणको दायरा बढाउन नसक्दा कोरोना संक्रमित कति छन् भन्ने यकिन तथ्यांक थाहा हुन सकेको छैन । जनस्वास्थ्यभन्दा कुर्सीको राजनीतिमा रमाइरहेको सत्तारुढ नेपाल कम्युनिस्ट पार्टी नेकपाको गैरजिम्मेवार शैलीप्रति सर्वत्र आलोचना भइरहेको छ । स्वयं प्रधानमन्त्री केपी शर्मा ओलीका अभिव्यक्तिबाट पनि कोरोना संक्रमणलाई सरकारले सामान्य रूपमा लिएको प्रतित हुन्छ ।

तथापि, स्वास्थ्य तथा जनसंख्या मन्त्रालयले जारी गरेको तथ्यांकअनुसार सोमबारसम्म नेपालमा १५ हजार ९६४ संक्रमित फेला परेका छन् भने ६ हजार ८१८ जना निको भइसकेका छन् । यो कुल संक्रमितको ४२.७१ प्रतिशत हो । सोमबार १८० संक्रमित थपिएका छन् ।

त्यस्तै नेपालमा हालसम्म कोरोना संक्रमणबाट ३५ जनाको ज्यान गइसकेको छ । यो संख्या पनि कुल संक्रमितको ०.२२ प्रतिशतमात्र हो ।

स्वास्थ्य मन्त्रालयका प्रवक्ता डा. जागेश्वर गौतमका अनुसार हालसम्म देशभर दुई लाख ५५ हजार ७२८ मानिसको पिसिआर परीक्षण गरिएको छ । तीमध्ये २ लाख ३९ हजार ७६४ जनामा कोरोना संक्रमण भेटिएन । हाल देशभर २९ हजार २१५ मानिस क्वारेन्टिनमा छन् भने आइसोलेसनमा ९ हजार ११८ जना छन् ।

प्रकाशित समय ०८:०१ बजे