सरकारले भदौ ३१ गतेसम्‍म नेपालका सबै नाका बन्द गर्ने निर्णय गरेको छ । सरकारका प्रवक्तासमेत रहेका अर्थमन्त्री एवं सूचना तथा सञ्चार प्रविधिमन्त्री डा. युवराज खतिवडाले नेपाल आउनै पर्ने नेपालीका लागि १० वटा नाका भने खुला रहने बताए ।

मंगलबार मन्त्रिपरिषदको निर्णय सार्वजनिक गर्दै मन्त्री खतिवडाले तोकिएका १० वटा सीमा नाकाबाट मात्रै नेपाल प्रवेश पाउने गरी सरकारले निर्णय गरेको जानकारी दिए । उनका अनुसार अब झापाको काँकरभिट्टा, मोरङको रानी, सिरहाको माडर, रौतहटको गौर, पर्साको वीरगञ्‍ज, रुपन्देहीको बेलहिया, कपिलवस्तुको कृष्णनगर, बाँकेको जमुना, कैलालीको गौरीफन्टा र गड्डाचौकी नाकाबाट मात्र नेपाल आउन पाइनेछ ।

त्‍यस बाहेकका नाकाबाट नेपाल प्रवेश गरे कानुनी कारबाही गरिने मन्त्री खतिवडाले बताए । यसअघि जेठ १२ गतेको मन्त्रिपरिषद् बैठकले २० वटा सीमा नाकाबाट प्रवेश अनुमति दिएको थियो ।

प्रकाशित समय १८:५८ बजे