गिनिज बुक अफ वर्ल्ड रेकर्डमा नाम लेखाउन लगातार पाँच रात छ दिन किताब पढेका बझाङका मुकेशराज जोशीले एक वर्ष पुग्न लाग्दा पनि प्रमाणपत्र पाएका छैनन् । गत असोज ६ गते पूर्व उपप्रधानमन्त्री भीम रावलसमेत उपस्थिति कार्यक्रममा ११ बजेर ४० मिनेटमा पढ्न सुरु गरेका जोशीले १० गते साँझ ४ बजेरसम्म पढेर कीर्तिमानी कायम गरेका थिए ।

‘नेपाललाई विश्वसामु चिनाउनका लागि रातदिन पढेर योभन्दा अगाडिका कीर्तिमानीलाई ब्रेक गरेको थिएँ । तर, एक वर्ष बित्न लागिसक्यो प्रमाणपत्र पाएको छैन,’ जोशीले भने । उनले गिनिज बुक अफ वर्ल्ड रेकर्डमा नाम लेखाउनका लागि १२४ घण्टा ३० मिनेटसम्म किताब पढेर कीर्तिमानी कायम गरेका थिए ।

‘विभिन्न मिडियाले अन्तर्वार्ताका लागि बोलाउँछन् । तर, आफूसँग प्रमाण पत्र नभएकाले जान पनि लाज लाग्ने अवस्था आएको छ,’ उनले दुखेसो पोखे । जोशीले नाइजेरियाली नागरिक बयोडे ट्रिअर्सस ओलाबान्मीको रेकर्ड ब्रेक गरेका थिए । ओलाबान्मीले सन् २००८ मा १२० घण्टा पढेर कीर्तिमानी कायम गरेका थिए ।

गिनिज इभेन्टस् नेपाल अध्यक्ष सन्तोष लामा भन्छन्, ‘मुकेश भाइको प्रमाण पत्रका लागि पहिले नै काम भइसक्थ्यो । बिचमा कोरोना भाइरसको महामारीका कारण कारण हेड अफिसबाट अहिले कुनै डकुमेन्टहरु नपठाउनु भनेकाले ढिलाई भएको हो । अब भोलिपर्सि नै सम्पूर्ण कागजातहरु पठाउने तयारीमा छु । कागजात तयारी भइसकेका छन् ।’

उनका अनुसार फास्ट ट्र्याकबाट पठाएमा झण्डै एक लाख जति नेपाली रुपैयाँ खर्च हुन्छ । र छिटो पनि हुन्छ । बिस्तारै पठाएमा १२ हप्ता जति लाग्छ र हेड अफिसमा सबै प्रमाणहरु हेरेर प्रमाण पत्र दिन्छन् । ‘मुकेश भाइको प्रमाण पत्रका लागि भोलिपर्सि नै प्रमाणहरु पठाएर १२ हप्तापछि प्रमाण पत्र आउँछ,’ लामाले भने ।

प्रकाशित समय १८:०५ बजे