वडा दसैंको चौथो दिन आज देशभरका शक्तिपीठमा भगवती कुष्माण्डाको पूजा आराधना गरिँदै छ । देवी कुष्माण्डाको आराधनाका लागि बिहानैदेखि विभिन्न शक्तिपीठमा भक्तजनहरु पुगेका छन् ।

आज काठमाडौंको गुहेश्वरी, मैतीदेवी, दक्षिणकाली, शोभाभगवती, नक्साल भगवती, भद्रकालीलगायतका देवीका शक्तिपीठ तथा धरानको दन्तकाली, भोजपुरको सिद्धकाली, ताप्लेजुङको पाथीभारा, सप्तरीको छिन्नमस्ता, गोरखाको मनकामना, पोखराको विन्ध्यावासिनी मन्दिरहरूमा दर्शनार्थीको घुइँचो लागेको छ ।

नवरात्रको चौथो दिन महामायाको चौथो स्वरुप भगवती कुष्माण्डा देवीको संकल्पबद्ध भएर आराधना गर्ने गरिन्छ । सूर्यमण्डलको भित्र रही सम्पूर्ण चराचरलाई प्रकाशित गर्ने अष्टभुजावती सिंहवाहिनी कुष्माण्डा देवीको इषत् हास्यबाट नै सम्पूर्ण ब्रह्माण्डको रचना भएको धार्मिक विश्वास छ । शक्ति हामी सबैका लागि आवश्यक छ । यसलाई कसैले सिर्जनात्मक रुपमा प्रयोग गर्दछन् त कसैले विध्वंसात्मक रुपमा ।

सम्पूर्ण प्राणीमा समरुपमा शक्तिको प्रवाह गराउने देवी कुष्माण्डा हुन् । उनै दवीलाई नै भगवतीको सात्विक भावावतार मानिन्छ । यिनको स्मरणले इच्छा र आशाको द्वन्द्वबाट छुटकारा मिल्छ । उपासकमा शान्तभावको पालना गरी निरन्तर पूजन, ध्यान र चिन्तन गर्नाले शक्ति प्राप्त हुन्छ ।

दैवी शक्ति आर्जन गर्नका लागि तान्त्रिक वा वैदिक विधिद्वारा कुष्माण्डा देवीको उपासना नवरात्रको यस दिनमा गर्ने प्रचलन रहँदै आएको छ । योग विज्ञानका अनुसार यस दिनमा साधकको ध्यान आहत चक्रमा केन्द्रित हुन्छ ।

नवरात्रका ९ दिनमा शैलपुत्री, ब्रह्मचारिणी, चन्द्रघण्टा, कुष्माण्डा, स्कन्दमाता, कात्यायनी, कालरात्री, महागौरी र सिद्धिदात्रीको पूजा आराधना गर्ने गरिन्छ ।

प्रकाशित समय ०८:३६ बजे