कञ्चनपुरको पुनर्वास नगरपालिकासँगै सिमाना जोडिएको उत्तर प्रदेशको लखिमपुर जिल्ला खिरीस्थित भारतीय बजार सम्पूर्णनगरको एक होटेलमा काम गर्दै आएका एक नेपाली युवकको रहस्यमय मृत्यु भएको छ।

पुनर्वास नगरपालिका-४ का २२ वर्षीय युवक रमेश नेपालीको बुधबार साँझ भारतको सम्पूर्णनगरमा मृत्यु भएको अवस्थामा फेला परेको प्रहरीले जनाएको छ । मृतक नेपाली भारतमा रोजगारी गर्दै आएको र लकडाउनको समयमा घर आएको भए पनि लकडाउनपश्चात् पुनः रोजगारीका लागि गएको परिवारका सदस्यले बताएका छन् ।

लकडाउनमा घर आएका नेपाली भदौ ३० गते घरबाट अचानक वेपत्ता भएको भनी खोजीका लागि असोज ३ गते ईलाका प्रहरी कार्यालय त्रिभुवनबस्तीमा उजुरी परेको थियो । ईलाका प्रहरी कार्यालाय ञिभुवनबस्तीका ईन्चार्ज प्रहरी निरीक्षक कैलाशसिं बिष्टका अनुसार उजुरी परेको केही समयपछि सम्पूर्णनगर खिरीको एक होटलमा काम गरिरहेको भन्ने खबर मृतकका परिवारले नै प्रहरीमा जानकारी गराएका थिए ।

मृतक नेपालीका दाजुले प्रहरीसमक्ष दिएको बयानमा भाइको मानसिक सन्तुलन पनि त्यति ठीक नभएको बताएका थिए । प्रहरी निरीक्षक बिष्टका अनुसार नेपालीको उपचारका क्रममा बुधबार साँझ सम्पूर्णनगरको एक मेडिकलमा मृत्यु भएको हो । अहिले मृतक नेपालीको शव पुनर्वास नगरपालिका-४ घगाउस्थित कार्गिल डाँडा नजिकैको घरमा ल्याइएको प्रहरीले जनाएको छ । तर, अचानक होटलमा काम गरिरहेको व्यक्तिको यसरी मृत्युको मुखमा पुग्नुले स्थानीयहरू आश्चर्यमा परेका छन् ।

अहिले स्थानीय ईलाका प्रहरी कार्यालय त्रिभुवनबस्तीका प्रहरी टोली पनि मृतकको घरमा पुगेको बताइएको छ । मृत्युबारे प्रहरीले अनुसन्धान गरिरहेको जनाएको छ ।

प्रकाशित समय १०:४८ बजे