नेपाल कम्युनिष्ट पार्टी (नेकपा)को सचिवालय  बैठकपछि नेकपाका शीर्ष नेताहरु प्रधानमन्त्री केपी शर्मा ओलीलाई भेट्न बालुवाटार पुगेका छन् । अनौपचारिक रुपमा पार्टी कार्यालय धुम्बाराहीमा बसेकाे बैठक सकेर नेताहरु पार्टीको औपचारिक बैठकका लागि पहल गर्न बालुवटार पुगेका हुन् ।

पार्टीका कार्यकारी अध्यक्ष पुष्पकमल दाहाल ‘प्रचण्ड’सहित वरिष्ठ नेताद्वय झलनाथ खनाल र माधव कुमार नेपाल, उपाध्यक्ष वामदेव गौतम र प्रवक्ता नारायणकाजी श्रेष्ठ ‘प्रकाश’ बालुवाटारमा पुगेका हुन् । बालुवाटार पुगेर प्रचण्डसहितका नेताहरुले पार्टीको औपचारिक बैठक बोलाउन ओलीसमक्ष अनुरोध गर्ने बताइएकाे छ । हिजो बसेको सचिवालयको अनौपचारिक बैठकले औपचारिक बैठक बोलाउनका लागि ओलीलाई सामूहिक रुपमै भेटेर पहल गर्ने निर्णय गरेको थियो ।

प्रधानमन्त्रीसमेत रहेका नेकपा अध्यक्ष ओलीको निर्देशन अनुसार महासचिव विष्णु पौडेल, सचिवालय सदस्यद्वय ईश्वर पोखरेल र रामबहादुर थापा धुम्बाराही बैठकमा सहभागी भएनन् । बैठकमा पार्टीका कार्यकारी दाहाल वरिष्ठ नेताद्वय झलनाथ खनाल र माधव कुमार नेपाल, उपाध्यक्ष बामदेव गौतम र प्रवक्ता नारायणकाजी श्रेष्ठ ‘प्रकाश’ सहभागी  थिए ।

प्रधानमन्त्री ओलीले पार्टी बैठक नबस्ने र बैठकले कुनै निर्णय गरेमा पार्टी विभाजन हुने चेतावनी दिँदै आएका छन् । उनले आफू निकटसँग अध्यादेश ल्याएर पार्टी विभाजन गर्ने वा अन्य कुनै कदम चाल्ने भन्ने विषयमा निरन्तर परामर्श गरिरहेको प्रचण्डपक्षीय नेताहरूकाे आरोप छ ।

यसअघि शुक्रबार पनि प्रचण्डकाे अध्यक्षतामा सचिवालय बैठक बसेकाे थियाे । हिजाेकाे बैठकमा पनि अर्का अध्यक्ष ओली, महासचिव विष्णु पौडेल, सचिवालय सदस्यद्वय ईश्वर पोखरेल र रामबहादुर थापा सहभागी थिएनन् । शुक्रबारको बैठकपछि अध्यक्ष ओलीले ‘पार्टी फुटको बिन्दु त्यहीबाट सुरू हुने’ प्रतिक्रिया दिएका छन् ।

नेकपामा कर्णाली प्रकरण, पर्सा घटना, मन्त्रिपरिषद्को बिस्तार तथा हेरफेर, राजदूत नियुक्ति र प्रधानमन्त्री ओलीले भारतीय गुप्तचर निकाय रअका प्रमुखसँग कुटनीतिक मर्यादाविपरित गरेको भेटले विवाद उत्कर्षमा छ ।

पार्टीमा विवाद बढ्दै गएका बेला आज ओली केन्द्रीय सचिवालय बैठक बोलाउन सहमत नभएमा आफैँले औपचारिक बैठक डाक्ने प्रचण्डकाे तयारी रहेको उनीनिकट नेताहरूले बताएका छन् ।

प्रकाशित समय १२:०५ बजे