तास तथा कौडा खेलिरहेको अवस्थामा विभिन्न ठाउँबाट ९१ जना जुवाडे पक्राउ परेका छन् । काठमाडौं, धनकुटा, लमजुङ, चितवन, कास्की, बारा र कैलालीमा जुवा खेलिरहेका ९१ जना पक्राउ परेका हुन् ।

काठमाडौंको कीर्तिपुर नगरपालिका-६ बिष्ट गाँउ (सिम) स्थित रबि बिष्टको टहरोमा जुवातास खेलिरहेको अवस्थामा सोही नगरपालिका-५ जाखा बस्ने ३७ वर्षीय महेश थापा लगायत १२ जनालाई शुक्रबार राति प्रहरीले पक्राउ गरेको छ । जुवातास खेलिरहेको भन्ने खबर प्राप्त हुनासाथ महानगरीय प्रहरी वृत्त कीर्तिपुरबाट खटिएको प्रहरीले उनीहरुलाई नगद २ लाख ५५ हजार ४ सय ५ रुपैयाँ र २ बुक तास सहित पक्राउ गरेको हो ।

यसैगरी कीर्तिपुर नगरपालिका-६ छापस्थित अछाम पञ्चदेवल बिनायक नगरपालिका-९ घर भई हाल सोही नगरपालिका छाप बस्ने जनक शाहीको टहरोमा जुवातास खेलिरहेको अवस्थामा ६ जनालाई शुक्रबार राति प्रहरीले पक्राउ गरेको छ । जुवातास खेलिरहेको भन्ने खबर प्राप्त हुनासाथ महानगरीय प्रहरी वृत्त कीर्तिपुरबाट खटिएको प्रहरीले नगद ५१ हजार २० रुपैयाँ र ३ बुक तास सहित उनीहरुलाई पक्राउ गरेको हो ।

त्यस्तै धनकुटाको धनकुटा नगरपालिका-७ स्थित मोहन श्रेष्ठको घर सोही ठाउँ बस्ने योगेन्द्र कार्कीले कोठा भाडामा लिई जुवातास खेलाई रहेको अवस्थामा धनकुटा नगरपालिका-१ बस्ने ३८ वर्षीय दिलिप रायमाझी लगायत १० जनालाई बिहीबार राति प्रहरीले पक्राउ गरेको छ । जुवातास खेलिरहेको भन्ने खबर प्राप्त हुनासाथ जिल्ला प्रहरी कार्यालय धनकुटाबाट खटिएको प्रहरीले नगद १ लाख ११ हजार ६ सय रुपैयाँ सहित उनीहरुलाई पक्राउ गरेको हो ।

त्यस्तै लमजुङको मध्यनेपाल नगरपालिका-६ भोर्लेटार बस्ने ३४ वर्षीय दिलिप कुमार गुरुङको घरमा जुवातास खेलिरहेको अवस्थामा दिलिप सहित ८ जनालाई शुक्रबार दिउँसो प्रहरीले पक्राउ गरेको छ । जुवातास खेलिरहेको भन्ने सूचनाको आधारमा ईलाका प्रहरी कार्यालय भोर्लेटारबाट खटिएको प्रहरीले नगद १ लाख ८७ हजार २५ रुपैयाँ सहित उनीहरुलाई पक्राउ गरेको हो ।

चितवनको रत्ननगर नगरपालिका-१६ खैरेटी बस्ने उदय बहादुर गुरुङको घरमा कौडा खेलिरहेको अवस्थामा सोही ठाउँ बस्ने ५८ वर्षीय उदय बहादुर गुरुङ लगायत ३० जनालाई शुक्रबार राति प्रहरीले पक्राउ गरेको छ । कौडा खेलिरहेको भन्ने खबर प्राप्त हुनासाथ ईलाका प्रहरी कार्यालय टाँडीबाट खटिएको प्रहरीले उनीहरुलाई नगद ३ लाख ५९ हजार ४ सय ९० रुपैयाँ र १६ थान कौडा सहित पक्राउ गरेको हो ।

त्यस्तै कास्कीको पोखरा महानरपालिका-६ लेकसाईडस्थित रोयलईमेज होटलको कोठामा कौडा खेलिरहेको अवस्थामा ५ जनालाई शनिबार बिहान प्रहरीले पक्राउ गरेको छ । कौडा खेलिरहेको भन्ने सूचनाको आधारमा वडा प्रहरी कार्यालय बैदामबाट खटिएको प्रहरीले नगद १ लाख ३७ हजार ४ सय ८५ रुपैयाँ र १६ थान कौडा सहित उनीहरुलाई पक्राउ गरेको हो ।

बारामा पनि कोल्हबी नगरपालिका-८ कट्टि टोलस्थित कुखुरा फार्ममा जुवातास तथा कौडा खेलिरहेका समिर कुमार चौधरी समेत १२ जनालाई शनिबार दिउँसो प्रहरीले पक्राउ गरेको छ । ईलाका प्रहरी कार्यालय कोल्हबीबाट खटिएको प्रहरीले जुवातास खेलिरहेको अवस्थामा नगद १ लाख १७ हजार रुपैयाँ र १६ वटा कौडा सहित उनीहरुलाई पक्राउ गरेको हो ।

त्यस्तै कैलालीको टिकापुर नगरपालिका-१ बस्ने टेक बहादुर कडायतको घरमा जुवातास खेलिरहेका टेकबहादुर समेत ८ जनालाई बिहीबार राति प्रहरीले पक्राउ गरेको छ । विशेष सूचनाको आधारमा ईलाका प्रहरी कार्यालय टिकापुरबाट खटिएको प्रहरीले नगद १ लाख २९ हजार रुपैयाँ र ४ गड्डी तास सहित उनीहरुलाई पक्राउ गरेको हो । यस सम्बन्धमा स्थानीय प्रहरीले थप अनुसन्धान गरिरहेको छ ।

प्रकाशित समय ०७:२४ बजे