विभिन्न संवैधानिक निकायमा गरिएको पदाधिकारी नियुक्ति असंवैधानिक भएको दाबी गर्दै सभामुख अग्नि सापकोटाले सर्वाेच्च अदालतमा दर्ता गराएको रिटउपर आज सुनुवाइ  हुँदैछ । गत शुक्रबार दायर भएको रिटको न्यायाधीश प्रकाशकुमार ढुंगानाको एकल इजलासमा सुनुवाइ हुने भएको हो ।

रिट निवेदनमा राष्ट्रपति कार्यालय, संवैधानिक परिषद्का अध्यक्ष रहने प्रधानमन्त्री, सदस्यहरु  प्रधानन्यायाधीश र राष्ट्रिय सभा अध्यक्ष, मुख्यसचिव तथा विभिन्न संवैधानिक निकायमा नियुक्त  पदाधिकारीलगायत ३९ जनालाई विपक्षी बनाइएको छ ।

सभामुख सापकोटाले संसद् नभएको अवस्थामा सुनुवाइ समिति नभएको भन्दै संवैधानिक परिषदका नियुक्तिसम्बन्धी सिफारिस फिर्ता पठाएका थिए । तर प्रधानमन्त्री केपी शर्मा ओलीले गत बुधबार अख्तियार दुरुपयोग अनुसन्धान आयोगसहित विभिन्न संवैधानिक निकायका अध्यक्ष तथा पदाधिकारी गरी ३२ जनालाई नियुक्ति दिएका थिए ।

नेकपासहित नेपाली कांग्रेस, जनता समाजवादी पार्टी, नागरिक समाज समेतले नियुक्तिकाे विराेध गरिरहेका छन् । कानुन व्यवसायीहरूले पनि नियुक्ति बदरको मागसहित सर्वोच्चमा निवेदन दिएका छन् ।

प्रकाशित समय १२:३२ बजे