सर्वाेच्च अदालतकाे संवैधानिक इजलासमा प्रतिनिधिसभा विघटनसम्बन्धी मुद्दाको सुनुवाइ जारी छ । यसअघि सुरूमा निवेदकतर्फका कानुन व्यवसायीहरूले संसद विघटन गर्ने निर्णय असंवैधानिक रहेको भन्दै बहस गरेका थिए । त्यसपछि सरकार पक्षका वकिलहरूले प्रतिरक्षा बहस गरे । निवेदक पक्षको जवाफी बहस सोमबार सकिएको थियो ।

मुद्दाउपर सुनुवाइको क्रममा आजबाट भने एमिकस क्युरीका सदस्यहरूले राय दिने क्रम सुरू भएको छ । यसै क्रममा वरिष्ठ अधिवक्ता बद्रीबहादुर कार्कीले प्रतिनिधिसभा विघटनको मुद्दामा फैसला गर्दा संविधानमा के लेखेको छ, त्यतिमात्र हेनुपर्ने बताएका छन् ।  ‘व्याख्या श्रीमानहरुले गर्ने हो । ब्याख्याको पनि कानुन छ । त्यहीअनुसार मैले गरेको व्याख्या मिल्यो कि मिलेन भनेर जाँच गर्ने हो । विधायकी मनसाय के थियो ? त्यही अनुसार बुझ्नुपर्छ,’ एमिकस क्युरीका तर्फबाट उनले राय दिए ।

अधिवक्ता कार्कीले जसले संविधान बनाए, उनीहरु नै संविधान दुर्घटनामा पर्‍यो भनेर सडक आन्दोलनमा रहेको पनि बताए । यस्तो स्थितिमा जे लेखिएको छ, त्यसैको आधारमा मात्र संवैधानिक इजलासले निर्णय दिनुपर्ने उनको राय छ । उनले संस्था रहे मात्र व्यक्तिका कमीकमजोरीहरू सच्चिने बताए । ‘संस्था रहे मात्र व्यक्तिमा भएको कमीकमजोरी पनि सच्याउन सकिन्छ,’ उनले भने, ‘जो हट्न चाहन्छ, विश्वासको संकट पर्छ भने विश्वासको मत लिन जाने हो । जसलाई हटाउन मन लाग्छ अविश्वासको प्रस्ताव ल्याउने हो । तर, संस्था अन्त्य गर्ने होइन ।’

प्रकाशित समय १४:०७ बजे