अख्तियार दुरुपयोग अनुसन्धान आयोगले मनोहरा खोलाको बालुवा निकाल्न ‘सेटिङ’ मिलाइदिने भन्दै ठेकेदारसँग घुस लिएको आरोपमा नौ जना प्रहरीलाई नियन्त्रणमा लिएको छ ।

अख्तियारले प्रहरी सहायक निरीक्षक गोपाल श्रेष्ठ र सुवास ढुंगाना तथा प्रहरी हवल्दार दीपक भारती, उमेश यादव र अमन चौधरीलाई नियन्त्रणमा लिएको प्रवक्ता रामेश्वर दंगालले जानकारी दिए । प्रसनी श्रेष्ठले ठेकेदारसँग ३० हजार, प्रसनी ढुंगाना र प्रहरी हवल्दार भारतीले ४५ हजार, प्रहरी हवल्दार यादव र चौधरीले पाँच/पाँच हजार रूपैयाँ घुस लिएको अख्तियारले जनाएको छ ।

त्यस्तै प्रहरी जवान रत्न रिजाल, मानसिंह रोका, दीपेन्द्र कुँवर र मुकेश पटेललाई पनि घुस लिएको आरोपमा अख्तियारले नियन्त्रणमा लिएको छ । उनीहरूले ठेकेदारसँग पाँच/पाँच हजार घुस मागेका थिए । उनीहरुलाई बानेश्वरका विभिन्न क्षेत्रबाट अख्तियारले नियन्त्रणमा लिएको हो । आयोगले उनीहरुको साथबाट एक लाख रूपैयाँ बरामद गरेको छ ।

प्रकाशित समय ०६:३३ बजे