प्रहरीले ठगी गरेको आरोपमा एक जनालाई पक्राउ गरेको छ । दोलखास्थित भीमेश्वर नगरपालिका–१ का ५१ वर्षीया कालीबहादुर लामालाई नियन्त्रणमा लिएको प्रहरीले जनाएको छ । दोलखाका स्थायी निबासी लामा हाल काठमाडौंको पेप्सीकोलामा बस्दै आएका थिए ।

नेपाल प्रहरीका पूर्व हबल्दारसमेत रहेका लामाले झण्डै १० जनालाई प्रहरी बनाइदिन्छु भन्दै ठगी गरेको अभियोग लागेको छ । उनलाई काठमाडौंबाट पक्राउ गरी दाङ लगिएको छ । लामाले सल्यानस्थित शारदा नगरपालिका–३ का २० वर्षीय गणेश भण्डारीसहित १० भन्दा बढीसँगबाट प्रतिव्यक्ति २ लाख ५० हजार रुपैयाँ ठगी गरेको आरोप लगाइएको छ ।

लामाले भगौडा प्रहरी जवानको खाली ठाउँमा भर्ती गरिदिने भन्दै ठगी गर्ने गरेको प्रहरीले बताएको छ । बुधबार काठमाडौंबाट पक्राउ परेका लामालाई प्रहरीले दाङ लगेको छ । प्रहरीका अनुसार लामाबाट ठगिने व्यक्तिहरु प्रहरीकोमा आउने क्रम जारी रहेकाले थप अनुसन्धान भइरहेको छ ।

प्रकाशित समय १६:१६ बजे