बाराको सिम्राैनगढ नगरपालिका–३ का पाँच वर्षीय बालकको अपहरणपछि हत्या भएको छ ।

धनेश्वर राय यादवका पाँच वर्षीय छोरा गुल्लु भनिने दीपक यादवको अपहरणपछि फिरौतिमा कुरा नमिलेपछि हत्या भएको हो । दीपक असोज २४ गते नै अपहरणमा परेका थिए ।

दीपक हजुरबुबासँग २४ गते रनीवासस्थित मेला हेरेर फर्किदै गर्दा मोटरसाइकलमा आएका दुई जनाले स्प्रे प्रयोग गरी बेहोस बनाएर अपहरण गरेका थिए । अपहरण लगत्तै उनीहरुले मृतक बालकका बाबुसँग फिरौतिस्वरुप १० लाख रुपैयाँ मागेको खुलेको छ ।

उनको शव शनिबार राति गाँउ नजिकै झाडीमा फेला परेको थियो । फिरौति रकम जुटाउने क्रममै बालकको हत्या भएको पारिवारिक स्रोतले जनाएको छ ।

प्रहरीले अपहरणको आरोपमा सोही टोलका १७ वर्षीय दुई युवकलाई पक्राउ गरेको छ । पक्राउ पर्नेमा हरेन्द्र कुशवहा र श्यामसुन्दर बैठा छन् । उनीहरुमाथि अनुसन्धान सुरु गरेको बारा प्रहरीले जनाएको छ । बैठाको घरबाट मृतक दीपकले लाएको बाला फेला परेको प्रहरीले जनाएको छ ।

प्रकाशित समय १६:४८ बजे