३८ सय किलो सुन तस्करी प्रकरणमा तानिएका उच्च अदालतका मुख्यन्यायाधीशसहित १२ जना न्यायाधीशमाथि छानबिन गर्न गठित कार्यदलको म्याद एक महिना थप गरिएको छ । सुन तस्करीको आदेश गर्दा न्यायिक विचलन गरेको आरोप लागेका ती न्यायाधीशहरुमाथि थप अध्ययन गरी छानबिन गर्न न्याय परिषद्ले एक महिना म्याद थप गरेको हो ।

उच्च अदालतका मुख्यन्यायाधीशसहित ८ जना न्यायाधीशको आदेशका बारेमा थप अध्ययन गर्न आवश्यक देखिएकाले फागुन मसान्तसम्म कार्यदलको म्याद थप गरिएको न्याय परिषद्ले जानकारी दिएको छ । यसका साथै अदालतका ४ न्यायाधीशमाथि पनि छानबिनका लागि समिति गठन भएपछि कार्यदलको म्याद फागुन मसान्तसम्म कायम गरिएको परिषद्ले बताएको छ ।

परिषद्का सचिव देवेन्द्र ढकालले काजमा सर्वोच्चमा हाजिर भएका न्यायाधीशमाथिको अनुसन्धान समाप्त नभएकाले सर्वोच्च अदालतका न्यायाधीशको नेतृत्वमा गठन भएको छानबिन कार्यदलको म्याद थप भएको बताए । परिषद्ले विराटनगर उच्च अदालतबाट ३८ किलो सुन तस्करी प्रकरणमा न्यायिक विचलन देखिएको भन्दै मुख्य न्यायाधीश कुलरत्न भुर्तेलसहित ८ न्यायाधीश छानबिनमा तानिएका थिए ।

प्रकाशित समय २०:२१ बजे