रुपन्देहीको देवदहमा जारी राष्ट्रिय औद्योगिक ब्यापार मेला कृषि तथा पर्यटन महोत्सवमा ठूलो आकारको खुकुरीमा दर्शको मुख्य ध्यान जाने गरेको छ । मेलामा जाने जो कोहीले पनि ठूलो आकारको कुखुरीलाई हर्ने, फोटो खिच्ने गरिरहेको देखिन्छ ।

मेलामा आकर्षणको केन्द्र बनेको उक्त खुकुरी ४२ किलो तौल तथा ९८ इन्च लामो छ । खुकुरीलाई एक्लै मानिसले उठाउन नसक्ने र तीन जनाको सहायताले मात्र खुकुरी उठाउन सकिन्छ ।

बुर्तिवाङ आरन ब्यवसायी सेवा बागलुङ्गका मनबहादुर विकले पहिलो पटक देवदह मेलामा ठूलो आकारको खुकुरी ल्याएका हुन् । मेलाको स्टल नम्बर १ सय ४१ मा राखिएको खुकुरी नेपालकै ठूलो आकारको खुकुरी रहेको स्टलधनी मनबहादुर विकले बताएका छन् ।

मानबहादुरले आफ्नो आरनमा स्थानीय सरोज, गणेश, दुर्गा, दिनेश, मिलन, डम्बर, शंकर र पुरन गरी आठ जनाको सहयोगमा ११ दिन लगाएर खुकुरी तयार पारेका हुन् । आफ्नै लगानीमा बनाएको खुकुरी त्रिभुवन अन्तर्राष्ट्रिय विमानस्थलमा राख्न दिने इच्छा रहेको मनबहादुरले बताए ।

उनले नेपाल वीर गोर्खालीले बोक्ने खुकुरीको देश हो भनेर चिनाउन पनि स्वदेशी तथा विदेशीहरु भित्रिने अन्तर्राट्रिय विमानस्थलमा खुकुरी राखेर नेपाललाई चिनाउने रहर रहेको सुनाए । सो खुकुरीको बजारमूल्य अहिले एक लाख ११ हजार १ सय ११ रहेको विकले बताए । कसैले आफूलाई अडर दिए बनाएर दिने समेत बताए ।

यसैबीच देवदह मेलामा ताजा जुस विक्रि वितरण भइरहेको छ । सुन्तला, मौसम र कागतीका ताजा जुस मेलामा जाने दर्शकका लागि नौलो बनेको छ । गुल्मीको धुर्कोटमा रहेको आदर्श फलफूल प्रसोधन केन्द्रले देवदह मेलामा ताजा जुस राखेको हो ।

केन्द्रले विभिन्न प्रकारका फलफूललाई प्रसोधन गरेर जुस, जाम, सर्बत, जेलि लगायतका पदार्थ उत्पादन गरि मेलामा राखिएको स्टल धनी तथा केन्द्रका सञ्चालक नारायण पोखरेलले जानकारी दिए ।

वैदेशिक रोजगारीबाट फर्किएका पोखरेलले करीब ५ लाखको लगानीमा प्रशोधन केन्द्र सञ्चालन गरेको सुनाए । उनले मेलाको ९० नम्बरको स्टलमा रहेको केन्द्रमा जुससँगै लप्सीको अचार, क्याण्डी लगायतका बस्तु विक्रिवितरण गर्दै आएका छन् ।

देवदहको प्रदर्शनीस्थलमा फागुनको १७ गतेदेखि जारी मेला २८ गतेसम्म सञ्चालन हुनेछ भने मेलाको ३ लाखभन्दा बढी दर्शकले अवलोकन गर्ने र १० करोडको कारोबार गर्ने लक्ष्य आयोजकले लिएका छन् ।

प्रकाशित समय १८:३९ बजे