उदयपुरको रौतामाई गाउँपालिका–३ लाफागाउँकी १३ वर्षीया बालिका एल्जिना खड्काको बलात्कारपछि हत्या गर्ने दुई किशोरलाई अदालतले जन्मकैदको फैसला सुनाएको छ ।

जिल्ला अदालत उदयपुरका न्यायाधीश तेजेन्द्रप्रसाद शर्माको इजालासले बालिका खड्काको बलात्कारपछि हत्या गर्ने दुई किशोरविरुद्ध जन्मकैदको फैसला गरेको हो । बालिका हत्यामा संलग्न १६ वर्षीय किशोरविरुद्ध १२ वर्षको जेल सजाय र एक लाख रूपैयाँ आर्थिक बिगो भराउने र अर्का १७ वर्षीय किशोरविरुद्ध १६ वर्ष दुई महिना जेल सजाय ३० हजार जरिवाना गर्ने फैसला गरेको अदालतका श्रेस्तेदार राजकुमार आचार्यले जानकारी दिए ।

दुवै किशोर १८ वर्षभन्दा तल भएकाले पूर्ण जन्मकैद सजायको आधा सजाय गर्ने गरिने फैसला भएको अदालतले जनाएको छ । गत कात्तिक ६ गते बाख्रा चराउन गएकी १३ वर्षीया बालिकालाई एउटै स्कूलका कक्षामा अध्ययन गर्ने ती दुई किशोरले बलात्कार गरेर हत्या गरेका थिए ।

प्रकाशित समय १०:३४ बजे