प्रधानमन्त्री केपी शर्मा ओलीले शुरु गरेको ‘हाम्रो नगर हाम्रो गाउँ, सबै बालबालिकाहरुलाई विद्यालय पुर्याऔ’ नारासहितको बाहिर रहेका बालबालिकाहरुलाई बिद्यालय भर्ना गर्ने सरकारको अभियानमा गैरआवासीय नेपाली संघ सहभागी भएको छ ।

संघले एभरेष्ट इन्टरनेशनल स्कूल जापानसँगको सहकार्यमा सबैभन्दा धेरै बालबालिकाह बिद्यालयबाहिर रहेको प्रदेश नम्बर २ को महोत्तरी जिल्लास्थित गौशाला नगरपालिकाको त्रिभूवन मावि, जन्ता मावि र दलित बस्ती बेलगाछीमा अवस्थित बीरेन्द्र माविबाट अभियान शुरु गरेको छ ।
संघले ५०० बालबालिकाहरुलाई नेपाल सरकारले तय गरेको मापदण्डअनुसार बिद्यालय जान प्रेरित गर्न आवश्यक साभाग्रीहरु झोला एक थान, कपि ६ थान, एक दर्जन कलम, टिफिन बक्स, जुत्ता र मोजा दुई जोर, विद्यालय पोशाक (सर्ट र पाइन्ट वा स्कर्ट) दुई जोर र जाडोको लागी ट्राउजर, स्वीटर र टोपी एक थान उपलब्ध गराउनेछ । स्थानियले भर्नाभन्दा पनि विद्यार्थीहरुलाई विद्यालयमा टिकाउन कठिन हुने औंलाए ।

स्थानिय शिक्षक शिक्षिकाहरुबाट प्राप्त जानकारी अनुसार विद्यालय बाहिर रहेका बालबालिकाहरुलाई बिद्यालयमा भर्ना गराउन जन्मदर्ता प्रमाणपत्रको अवश्यक्ता भएकोले पनि विद्यार्थी भर्नामा कमि आएको हो । त्यस अवसरमा स्थानिय जनप्रतिनिधिहरुको रोहवरमा जन्मदर्ता गराई विद्यार्थी भर्ना गरिएको थियो ।

स्थानीय जनप्रतिनिधिहरुले एभरेष्ट इन्टरनेशनल स्कूल जापान र गैरआवासीय नेपाली संघलाई नेपाल सरकारको यस अभियानमा सहभागी भएकोमा कृतज्ञता व्यक्त गर्दै आगामी दिनहरुमा पनि यस कार्यलाई लक्ष्य अनुसार सफलता हाशिल दिलाउन निरन्तर सहयोग र सहकार्यको आपेक्षा रहेको वताए ।

प्रकाशित समय १९:४६ बजे