काठमाडौं– सूचना तथा सञ्चार प्रविधिको क्षेत्रमा कार्य गर्दै आएको कम्प्युटर एसोसिएसन नेपाल (क्यान) महासंघले प्राविधिक शिक्षातर्फ छात्रवृत्तिको सुरुवात गरेको छ । राष्ट्रभित्र सूचना प्रविधिको अध्ययन–अध्यापन गर्ने/गराउने कलेजहरुको सहयोगमा गरिब तथा जेहेन्दार विद्यार्थीका लागि छात्रवृत्ति प्रदान गर्न लागिएको हो ।

काठमाडौंको मैतिदेवीमा रहेको सूचना प्रविधि विषयमा अध्यापन गराउने कलेज लर्ड बुद्ध एजुकेसन फाउन्डेसनसंगको सहकार्यमा क्यान महासंघले यो वर्ष ४९ जना विद्यार्थीलाई छात्रवृत्ति प्रदान गर्नेछ । ‘नेसनल आईसीटी स्कलरसिप– २०७५’ नाम दिई देशका सातै प्रदेशका विद्यार्थीले समान अवसर पाउने गरी प्रत्येक प्रदेशबाट एकजना छात्रालाई पूर्ण छात्रवृत्ति र ४२ जनालाई आंशिक छात्रवृत्ति प्रदान गरिनेछ । ग्रामीण क्षेत्रमा समेत सूचना प्रविधिको विकास र सबै नागरिकमा यसको पहुँच पुर्याउनमा यस कार्यले टेवा पुग्ने विश्वास क्यान महासंघको छ । छात्रवृत्ति प्रदान गर्नेसम्बन्धी सम्झौतापत्रमा सोमबार क्यान महासंघका तर्फबाट अध्यक्ष हेमन्त चौरसिया र लर्ड बुद्ध एजुकेसन फाउन्डेसनका तर्फबाट फाउन्डेसनका अध्यक्ष पंकज जलानले हस्ताक्षर गरे ।

छात्रवृत्तिअन्तर्गत फिमेल मेरिट आईसीटी स्कलरसिप प्रत्येक प्रदेशबाट चार जनाका दरले २८ जना छात्रालाई प्रदान गरिनेछ भने आईसीटी मेरिट स्कलरसिप प्रत्येक प्रदेशबाट तीनजनाका दरले २१ जनालाई प्रदान गरिनेछ । सम्झौताअनुसार ४९ जना विद्यार्थीले एक करोड ८३ लाख ३६ हजार पाँच सय रुपैयाँबराबरको छात्रवृत्ति पाउनेछन् ।
छात्रवृत्ति प्राप्त विद्यार्थीले मलेसियाको एसिया प्यासेफिक युनिर्भसिटी अफ टेक्नोलाजी एन्ड इनोभेसनको एफिलिएसनमा सञ्चालित लर्ड बुद्ध एजुकेसन फाउन्डेसनमा स्नातक तहअन्तर्गत बीएससी आईटी अध्ययन गर्न पाउनेछन् । मान्यताप्राप्त शिक्षण संस्थाबाट ५० प्रतिशत अंकसहित प्लस टु अर्थात् सो सरह अध्ययन गरेका र कक्षा १० को गणित विषयमा कम्तीमा ५० प्रतिशत अंक ल्याई सीटीईभीटीबाट कम्प्युटर इन्जिनियरिङमा डिप्लोमा गरेकाहरुले छात्रवृत्तिका लागि अवेदन दिन सक्नेछन् । त्यस्तै कक्षा १२ को परीक्षा दिएर बसेका विद्यार्थीले पनि आवेदन दिन सक्ने क्यान महासंघले जनाएको छ ।
छात्रवृत्ति प्रदान गर्नका लागि क्यान महासंघले जिल्ला, प्रदेश र केन्द्रीयस्तरको छात्रवृत्ति छनौट समिति गठन गर्नेछ । समितिले कक्षा १० र कक्षा १२ को प्राप्त अंक, स्थायी बसोबास, आर्थिक अवस्था र स्थानीय सरकारको सिफारिसका आधारमा छनौट गर्नेछ  ।
छात्रवृत्तिका लागि इच्छुक विद्यार्थीले क्यान महासंघको वेबसाइट www.can.org.np  र लर्डबुद्ध एजुकेसन फाउन्डेसनको वेबसाइट www.lbef.org बाट २०१८ जुलाई २५ तारिकभित्र आवेदन दिनुपर्नेछ । आवेदन दिँदा एउटा फोटो, नागरिकता या जन्मदर्ता प्रमाणपत्र, कक्षा १० र १२ को मार्कसिटको प्रतिलिपि, कक्षा १२ को प्रवेशपत्र र स्थानीय सरकारको सिफारिसपत्र पेस गर्नुपर्नेछ ।

प्रकाशित समय १७:२७ बजे