पशुपति क्षेत्र विकास कोषले श्री पशुपतिनाथ मन्दिरमा १४१ किलोको सुनको जलहारी निर्माण गर्ने भएको छ । हालसम्म पशुपतिनाथको शिवलिंगमा रहेको पिठिकामा चाँदीको आवरणयुक्त जलहरी रहेको सुनको जलहरी निर्माण गर्ने निर्णय कोषले गरेको हो ।

जलहरीमा २४ क्यारेट सुनको प्रयोग गरिने कोषले जनाएको छ । यसका लागि कोषले श्रद्धालु भक्तजनसँग सहयोगका लागि आह्वान गरेको छ । दाताले  न्यूनतम एक तोलादेखि अधिकतम एक किलोसम्म सुन सहयोग गर्न सक्नेछन् । सुन दिने दाताको नाम दाताको स्वेच्छामा कोषले स्मारिकामा प्रकाशित गर्ने जनाएको छ ।

दाताले नेपाल इन्भेस्टमेन्ट बैंक, नेपाल एसबिआई बैंक, कुमारी बैंक, एभरेस्ट बैंक र कृषि विकास बैंकमा सुनका लागि नगद जम्मा गर्न सक्ने कोषका कोषाध्यक्ष एवं जलहरी निर्माण व्यवस्थापन समितिका संयोजक डा. मिलनकुमार थापाले जानकारी दिए । उनका अनुसार सुनको जलहरीका लागि गोप्य दान गर्न चाहने भक्तजनले पशुपतिनाथ मन्दिरको प्रांगणमा रहेको एउटा र पश्चिम गेटबाहिर रहेको अर्को दानपात्रमा दान दिन सक्ने पनि उनले बताए ।

 महाशिवरात्रिको पूर्वसन्ध्यामा शोभायात्रा

महाशिवरात्रिको पूर्वसन्ध्यामा मंगलबार पशुपति क्षेत्रमा शोभायात्रा गरिएको छ । नेपाल भ्रमण वर्षसँग जोडेर महाशिवरात्रिलाई भव्य रूपमा मनाउने योजनाअनुसार शोभा यात्रा गरिएको पशुपति क्षेत्र विकास कोषले जनाएको छ ।

महाशिवरात्रिमा धेरैभन्दा धेरै धार्मिक पर्यटक भित्र्याउने उद्देश्यसहित शोभायात्रा गरिएको हो । मंगलबार बिहान पशुपतिनाथ मन्दिरको पश्चिम गेटबाट सुरु भएको शोभायात्रा वनकाली, तिलगंगा, तीनकुने, नयाँ बानेश्वर, पुरानो बानेश्वर, गौशाला हुँदै हंसमण्डपसम्म पुगेको थियो ।

यात्रामा साधुसन्त, महन्त, सेना, सशस्त्र प्रहरी र नेपाल प्रहरीको ब्यान्ड टोलीको पनि सहभागिता रहेको कोषले जनाएको छ । शोभायात्रामा कोषका पदाधिकारी र कर्मचारी, नेपाल वेद विद्याश्रमका शिक्षक, विद्यार्थी र महाशिवरात्रि मूल समारोह समारोह समितिको पनि सहभागिता थियो ।

प्रकाशित समय १२:५२ बजे