कैलाली प्रहरीले बलात्कारको आरोपमा थुनामा रहेका नेपाल कम्युनिस्ट पार्टी नेकपाका सचेतक एवं प्रदेशसभा सदस्य अक्कल रावललाई आफ्नै कार्यकक्षमा होली मनाउन दिएको पाइएको छ । नेकपानिकटका महिलाको समूहले जिल्ला प्रहरी कार्यालय कैलालीका प्रहरी उपरीक्षक सुदीप गिरिकै कार्यकक्षमा पुगेर बलात्कारको आरोपमा थुनामा रहेका प्रदेशसभा सदस्य रावलसँग रंग लगाएर होली खेलेको तस्बिर सामाजिक सञ्जालमा बाहिरिएको हो ।

प्रहरी उपरीक्षक सुदीप गिरिको कार्यकक्षको सोफा र पर्दा देखिने गरी सार्वजनिक भएको तस्बिरमा तत्कालीन अखिल नेपाल महिला संघ कैलालीकी अध्यक्ष गीता सोडारीसहितका तीन महिला र एकजना पुरुष हाँस्दै गरेको तस्बिर सार्वजनिक भएको हो । तत्कालीन माओवादी केन्द्रबाट नेकपाको सुदूरपश्चिम प्रदेश कमिटी सदस्य रहेकी लक्ष्मी शाहसहितका तीनजना महिला र एकजना पुरुषले होली खेलेका हुन् । रावल बलात्कार आरोपमा फागुन २१ गतेदेखि प्रहरी हिरासतमा छन् । नेकपा प्रदेश कमिटी सदस्य शाहले आफ्नो फेसबुक वालमा पोस्ट गरेको तस्बिरमा ‘स्पेसल होली’ स्टाटस लेखेकी छन् ।

धनगढी उपमहानगरपालिका ४ मा डेरा गरी बस्दै आएकी एक महिलाले प्रदेशसभा सदस्य रावलले आफूमाथि कोठामै आएर बलात्कारको प्रयास गरेको भन्दै फागुन १४ गते जिल्ला प्रहरी कार्यालय कैलालीमा उजुरी दिएकी थिइन् । श्रीमान काठमाडौं गएका बेला मामा नाता लगाउँदै रावल माघ २१ गते आफ्नो कोठामा आएर बलात्कार प्रयास गरेको महिलाले उजुरीमा उल्लेख गरेकी छन् । रावललाई फागुन २१ गते कैलाली प्रहरीले पक्राउ गरेको थियो । उनलाई पहिलो पटक चार दिन र त्यसपछि सात दिनको म्याद थपेर प्रहरीले अनुसन्धान गरिरहेको छ ।

विवाहित महिलामाथि बलात्कारको प्रयास गर्ने पीडकलाई हौसला दिने गरी नेकपाकै महिला नेतृहरुले प्रहरी प्रमुखकै कार्यकक्षमा बोलाएर अबिरजात्रा गरेपछि सामाजिक सञ्जालमा तीव्र विरोध भइरहेको छ । रावलसँग हाँस्दै फोटो खिचाएकी गीता सोडारीका श्रीमान पनि धनगढीकै एक महिलासँग अनैतिक क्रियाकलाप गरेको भन्दै सामाजिक विकासमन्त्रीको पदबाट निष्कासनमा परेका थिए । तत्कालीन सामाजिक विकासमन्त्री रहेका सोडारीलाई नेकपाले पार्टीबाट समेत निलम्बन गरेको छ ।

कैलालीका प्रहरी प्रवक्ता दक्षकुमार बस्नेतले भने होलीका दिन हिरासतमा रहेका सबैलाई होली खेल्न दिइएको बताए । उनले कार्यकक्ष नभएर जिल्ला प्रहरी कार्यालयको मिटिङ हलमा होली खेलेको बताए । उनले भने, ‘तर बाहिर आएर होली खेल्ने कुरा थिएन, साथीहरुले के गरेछन् ?’

प्रकाशित समय १६:५४ बजे