विश्वव्यापी महामारीको रुपमा फैलिएको कोरोनाको व्यापक प्रकोप लिएको छ । पछिल्लो २४ घण्टामा मात्रै चार हजार ३६७ जनाले ज्यान गुमाइसकेका छन् ।

चीनबाट सुरु भएको भाइरस विश्वका सबै देशमा पुगेको छ । विश्वभरको तथ्यांक हेर्दा पछिल्लो २४ घण्टाभित्रै ७३ हजार ३८९ जनामा नयाँ संक्रमण देखिएको छ । चीनमा भने नयाँ मृत्युदर र संक्रमण पनि घटेको छ ।

केही दिन यता कोरोनाको प्रकोप अमेरिकामा बढी फैलिएको छ । अमेरिकामा एकै दिनमा २४ हजार ४९२ जनामा नयाँ संक्रमण भएको छ भने ७४२ जनाले एकैदिन ज्यान गुमाएका छन् । अमेरिकामा यो समाचार तयार पार्नसम्म तीन हजार ८८३ जनाले ज्यान गुमाइसकेका छन् भने एक लाख ८८ हजार २८० जनामा संक्रमण देखिएको छ ।

त्यस्तै इटालीमा सबैभन्दा बढी ज्यान गुमाउनको मुलुक भएको छ । पछिल्लो २४ घण्टामै इटालीमा ८३७ जनाले ज्यान गुमाएका छन् । त्यस्तै चार हजार ५३ जनामा नयाँ संक्रमण देखा परेको छ । अहिलेसम्म इटालीमा ज्यान गुमाउनेको संख्या १२ हजार ४२८ पुगेको छ भने संक्रमणको संख्या एक लाख ५ हजार ७९२ पुगेको छ । उपचारपछि सञ्चो हुनेको संख्या १५ हजार ७२९ पुगेको छ ।

तेस्रो नंमा विश्वको सबैभन्दा बढी मानवीय क्षति भएको देशको रुपमा स्पेन देखिएको छ । स्पेनमा पछिल्लो २४ घण्टाभित्रै ७४८ जनाले ज्यान गुमाएका छन् भने सात हजार ९६७ जनामा नयाँ संक्रमण देखिएको विश्व स्वास्थ्य संगठनले जनाएको छ । अहिलेसम्म स्पेनमा ज्यान गुमाउनेको संख्या आठ हजार ४६४ पुगेको छ भने संक्रमितको संख्या ९५ हजार ९२३ पुगेको छ ।

वर्ल्ड म्याटरको तथ्यांकअनुसार दिनानुदिन कोरोनाको संक्रमण बढ्दै गएको छ । विश्वभर कोरोनाको संक्रमण आठ लाख ५८ हजार १२७ जनामा फेला परेको छ भने ४२ हजार १४० जनाको ज्यान गएको छ । त्यस्तै उपचारपछि सञ्चो हुनेको संख्या एक लाख ७७ हजार १४१ पुगेको तथ्यांकमा उल्लेख छ ।

तालिकासहित

प्रकाशित समय ०७:४७ बजे