कर्णाली प्रदेश सभाको विधायन तथा प्रदेश मामिला समितिले दैलेखमा तत्काल कोरोना परीक्षण बढाउन प्रदेश संकट व्यवस्थापन केन्द्रलाई निर्देशन दिएको छ । शुक्रबार बसेको समितिको बैठकले कोरोनाभाइरसको रेड जोन बन्ने स्थिति आएको भन्दै कर्णाली प्रदेशमा पूर्वतयारीका लागि संकट व्यवस्थापन समितिलाई निर्देशन दिएको हो ।

दैलेखमा कोरोनाभाइरस संक्रमितको संख्या बढ्दै गएको भन्दै क्वारेन्टिनमा रहेका नागरिकको संख्याका आधारमा तत्काल परीक्षण बढाउन पिसिआर मेसिन जडान गर्ने र सम्भव भए अर्को प्रदेशमा समेत स्वाब लगेर परीक्षण बढाउन निर्देशन दिएको हो ।

समितिको बैठकले प्रदेशभर कम्तीमा पनि २० वटा एम्बुलेन्स र आवश्यक शववाहन किन्ने व्यवस्था गरी त्यसका लागि आवश्यक चालकको व्यवस्था मिलाउन निर्देशन दिने, स्वास्थ्यकर्मीको संख्या बढाउन करारमा भर्ना गरी नियमित परीक्षण तथा परीक्षणको दायरा बढाउन निर्देशन दिने, क्वारेन्टिन, आइसोलेसन र आवश्यक ठाउँमा प्रदेश र संघीय सरकारसँग समन्वय गरी नेपाल प्रहरी, सशस्त्र प्रहरीको तालिमे जनशक्तिसमेतको व्यवस्थापन गर्न समन्वय गरी परिचालन गराउन निर्देशन दिने र संक्रमितको संख्या र जोखिमको अवस्थाको आधारमा प्रभावित  जिल्ला र पालिकाहरुमा स्वास्थ्यकर्मीहरुको परिचालन गरी स्वाब संकलन र परीक्षण बढाउन निर्देशन दिने निर्णय गरेको संसद सचिवालय कर्णाली प्रदेशले जानकारी दिएको छ ।

प्रकाशित समय १५:५३ बजे