सेयर बजार परिसूचक नेप्से मंगलबार अन्तिम १० मिनेटमा १७ अंकले बढेपछि समग्र बजार परिसूचक २६०१.५१ अंकमा उक्लिएको छ । दिनभर उतारचढावमय भएको नेप्से परिसूचक अन्तिम १० मिनेटमा तीव्र गतिले उकालो लागेपछि १५.५ अंकले बजार सकारात्मक बन्यो ।

आइतबार ३३ अंकले घटेको बजार सोमबार ९२ अंकले बढेको थियो । मंगलबार बैँक, विकास बैँक, अन्य र म्युचुअल समूहमात्र बढेका छन् भने बाँकी समूह राताम्य भएका छन् । बैँक समूह सर्वाधिक २.०८ प्रतिशतले बढेको छ ।

आज २०८ कम्पनीको १ करोड ७७ लाख ३२ हजार ७६५ कित्ता सेयर १० अर्ब ३ करोड ५४ लाख रूपैयाँबराबरमा कारोबार भएको छ । यो कारोबार रकम सोमबारको तुलनामा सामान्यमात्र कम हो । सोमबार १० अर्ब ३८ करोडभन्दा बढीको सेयर किनबेच भएको थियो ।

बैँक समूहको वृद्धिसँगै बजार दिगो भएर बढ्ने विश्लेषण हुन थालेका छन् । मंगलबार पनि केही वाणिज्य बैँक सर्वाधिक बढ्ने १० कम्पनीको सूचीमा परेका छन् भने सर्वाधिक कारोबार हुनेमा बैँक समूहकै बाहुल्य छ ।

प्रकाशित समय १५:३० बजे