विश्वभर कोरोना संक्रमितको संख्या ६८ लाख नाघेको छ । एकै दिनमा एक लाख ३० हजार ५२९ जनामा कोरोना पुष्टि भएसँगै संक्रमितको संख्या ६८ लाख नाघेको हो ।

विश्व स्वास्थ्य संगठनका अनुसार अहिलेसम्म विश्वभर ६८ लाख ४४ हजार ७०५ जनामा कोरोना संक्रमण देखिएको छ । त्यस्तै भाइरसकै कारण ज्यान गुमाउनेको संख्या तीन लाख ९८ हजार नाघेको छ । चीनको वुहानबाट जनवरी २२ देखि सुरु भएको भाइरस विश्वका २१५ देशमा पुगेको छ ।

वर्ल्डोमिटरको तथ्यांकअनुसार कुल संक्रमितमध्ये ३३ लाख ४८ हजार ८३१ जनाको सफल उपचार भइसकेको छ भने ३० लाख ९७ हजारको उपचार भइरहेको बताइएको छ । उपचाररतमध्ये पनि ५३ हजार ६१३ जनाको अवस्था चिन्ताजनक रहेको विश्व स्वास्थ्य संगठनले जनाएको छ ।

सबैभन्दा बढी प्रकोप फैलिएको अमेरिकामा संक्रमितको संख्या २० लाखको नजीक पुगेको छ । शनिबार बिहानसम्म अमेरिकामा संक्रमितको संख्या १९ लाख ६५ हजार ७०८ पुगेको हो । त्यस्तै एक लाख ११ हजार ३९० जनाको ज्यान गएको छ । अमेरिकी स्वास्थ्य विभागका अनुसार संक्रमितमध्ये सात लाख ३८ हजारभन्दा बढी व्यक्तिको सफल उपचार भएको छ भने ११ लाख १५ हजारभन्दा बढीको उपचार भइरहेको छ ।

कोरोनाको प्रकोप फैलिएको अमेरिकापछि ब्राजिल देखिएको छ । ब्राजिलमा अहिलेसम्म ६ लाख ४६ हजार व्यक्तिमा कोरोना देखिएको छ भने ३५ हजारभन्दा बढी व्यक्तिले ज्यान गुमाएका छन् । त्यस्तै तीन लाख दुई हजारभन्दा बढीको सफल उपचार भएको छ भने बाँकीको उपचार भइरहेको जनाइएको छ ।

प्रकाशित समय ०८:३४ बजे