विश्वभर एकै दिनमा दुई लाख ६० हजारभन्दा बढी व्यक्तिमा कोरोना संक्रमण पुष्टि भएको छ । विश्व स्वास्थ्य संगठनका अनुसार अहिलेसम्म विश्वभर एक करोड ३९ लाख ४९ हजार ३८५ व्यक्तिमा कोरोना संक्रमण देखिएको हो ।

वर्ल्डोमिटरको तथ्यांकअनुसार विश्वभर ज्यान गुमाउनेको संख्या पनि बढ्दै गएको छ । गएको २४ घण्टामा मात्रै ६ हजार ४ सयभन्दा बढी व्यक्तिको मृत्यु भएपछि ज्यान गुमाउनेको संख्या पाँच लाख ९२ हजार ६९० पुगेको हो ।

त्यस्तै कुल कोरोना संक्रमित ७२ लाख ७८ हजारभन्दा बढी व्यक्ति उपचारपछि घर फर्किएका छन् । एकै दिनमा हजारौंको संख्यामा डिस्चार्ज भएपछि घर फर्किनेको संख्या ८२ लाख ७८ हजार ९७४ पुगेको हो भने ५० लाख ७७ हजार ७२१ जनाको उपचार भइरहेको छ । उपचाररतमध्ये पनि करिब ६० हजारको हाराहारीमा गम्भीर बिरामी देखिएका छन् ।

सबैभन्दा बढी प्रकोप फैलिएको अमेरिकामा कोरोना संक्रमितको संख्या ३६ लाख नाघेको छ । गएको २४ घण्टामा मात्रै अमेरिकामा ७३ हजार ३८८ जनामा संक्रमण देखिएपछि कुल संक्रमितको संख्या ३६ लाख ९५ हजार २५ पुगेको हो । त्यस्तै ज्यान गुमाउनेको संख्या पनि एक लाख ४१ हजार नाघेको छ । गएको २४ घण्टामा मात्रै ९६३ जनाको ज्यान गएको अमेरिकी स्वास्थ्य विभागले जनाएको छ ।

अहिलेसम्म १६ लाख ७९ हजारको उपचार भइसकेको छ भने १८ लाख ७४ हजारको उपचार भइरहेको जनाएको छ । उपचाररतमध्ये पनि अमेरिकामा १६ हजार ४५२ जनाको स्वास्थ्य अवस्था चिन्ताजनक रहेको बताइएको छ ।

प्रकाशित समय १०:०९ बजे