नेपाल पत्रकार महासंघले पत्रकार बलराम बानियाँको ‘रहस्यमय’ ढंगले भएको निधनबारे गहिरो छानविन गरी सत्यतथ्य सार्वजनिक गर्न सरकारसँग माग गरेको छ । बुधबार विज्ञप्ति जारी गर्दै  महासंघले पत्रकार बानियाँको दु:खद निधनले महासंघ स्तब्ध भएको जनाएको छ ।

‘महासंघ बानियाँको रहस्यमय ढंगले भएको निधनबारे गहिरो छानविन गरी सत्यतथ्य सार्वजनिक गर्न सरकारसँग माग गर्दछ,’ विज्ञप्तिमा भनिएकाे छ । महासंघका पूर्व केन्द्रीय सचिवसमेत रहेका बानियाँको दु:खद निधनले नेपाल पत्रकार महासंघ स्तब्ध भएको भन्‍दै शोकसन्तप्त परिवारजनप्रति गहिरो समवेदनासमेत व्यक्त गरेको छ ।

गत सोमबारदेखि बेपत्ता बानियाँको शव मकवानपुरको मान्दु हाइड्रोपावर क्षेत्रमा फेला परेको थियो । उनी बेपत्ता भएको भन्दै महानगरीय प्रहरी परिसरमा बुधबार बिहान निवेदन परेको थियो ।

लामो समयदेखि कान्तिपुर दैनिकमा कार्यरत बानियाँ गत सोमबार अपरान्हदेखि सम्पर्कविहीन भएका थिए । तनहुँ स्थायी घर भएका पत्रकार बानियाँका श्रीमती, एक छोरा र एक छोरी छन् ।

प्रकाशित समय १७:२७ बजे