जिल्लाको उत्तरी सीमा हिल्छा नाकामा आवागमनमा सहज गर्नका लागि नेपाली मौलिकता झल्कने कलात्मक प्रवेशद्वारको निर्माण गरिएको छ । यसको लागत पौन करोड खर्च भएको छ ।

पछिल्लोसमय भारतीय र अन्य तेस्रो मुलुकका पर्यटकहरु मानसरोवर कैलास तिर्थयात्राका लागि बढिरहेका बेला यो नाका व्यवस्थित गर्नुपर्ने माग आइरहेको बेला नेपाली मौलिकता झल्कने प्रवेशद्वार निर्माणले गर्दा स्थानीय र व्यवसायीहरुमा उत्साह थपेको नाम्खा गाउँपालिका यारी गाउँका खार्केप लामाले खुशी व्यक्त गरेका छन् ।

अन्तर्राष्ट्रिय सीमा नाकाबाट ५० मिटर यता नेपाली भूमिमा नेपाली कला कौशल झल्कने प्रवेशद्वारको निर्माणले एकातिर सुरक्षाको काममा सहयोग पुग्ने भएको छ भने अर्कातिर आवतजावतमा सजिलो हुने डिभिजन वन कार्यालयका निमित्त कार्यालय प्रमुख निरज झाले बताए । यो प्रवेशद्वार लगायत अन्य अत्यावश्यक भौतिक पूर्वाधारका लागि पाँच लाखमा डीपीआर तयार गरिएको छ । यस अनुसार पहिलो चरणमा प्रवेशद्वार निर्माण सम्पन्न भएको छ भने अन्य कुराहरु क्रमिक रुपमा हुने कार्यालय प्रमुख झाको भनाइ छ ।

यो उत्तरी हिल्छा नाका कर्नाली क्षेत्रको अति प्रचलित र प्रसिद्ध नाका भएकाले यहाँ समयमै पूर्वाधार लगायत अन्य कामहरु गरेमा यसले जिल्लाको सुरक्षा, सीमा, पर्यटन र अन्य अर्थ उर्पाजन काममा सहयोग पुग्ने भएको छ ।

प्रकाशित समय १७:५८ बजे