तीन दिने नेपाल भ्रमणमा रहेको भारतीय सेनाध्यक्ष मनोज मुकुन्द नरवणेलाई नेपाली सेनाले गार्ड अफ अनर दिएकाे छ । सैनिक मुख्यालमा बिहीबार आयोजित कार्यक्रममा नरवणेलाई गार्ड अफ अनर प्रदान गरिएकाे हाे । त्यसअघि नरवणे सैनिक मञ्च टुँडिखेलस्थित वीर स्मारकमा पुष्पगुच्छा अर्पण गरेका थिए । नरवणेले भारतीय सेनाको तर्फबाट नेपाली सेनालाई स्वास्थ्य सामग्री पनि हस्तान्तरण गरेका छन् ।

उनलाई अपराह्न राष्ट्रपति विद्यादेवी भण्डारीले शितल निवासमा हुने विशेष कार्यक्रममा नेपाली सेनाको मानार्थ महारथीको दर्ज्यानी चिन्ह प्रदान गर्ने कार्यक्रम छ । त्यसपछि सेनाध्यक्ष नरवणेले राष्ट्रपति भण्डारीसँग शिष्टाचार भेट गर्नेछन् । यसका साथै नरवणेले रक्षा मन्त्रालयको समेत जिम्मेवारी सम्हालेका प्रधानमन्त्री केपी शर्मा ओली र प्रधानसेनापति पूर्णचन्द्र थापासँग छुट्टाछुट्टै भेट गर्ने कार्यक्रम रहेको छ ।

प्रधानसेनापति थापाको औपचारिक निमन्त्रणमा बुधबार नेपाल आएका नरवणेले पहिलो दिन बसन्तपुर गएर जीवित देवी कुमारी र पशुपतिनाथको बाहिरबाटै दर्शन गरेका थिए ।

(तस्बिरहरू : रासस)

प्रकाशित समय १२:१२ बजे