पोखरा रंगशालामा शुक्रबारबाट कप्तान अरुणा शाहीलाई जिताउने अभियानका साथ सुरु भएको पुरुष भलिबल लिग चरणका खेल पूरा भएका छन् । एनएसजेएफ स्पोर्टस अवार्डअन्तर्गत पिपल्स च्वाइस विद्यामा मनोनयनमा परेकी नेपाली महिला भलिबल टिमकी कप्तान अरुणा शाहीलाई जिताउने अभियानका लागि प्रतियोगिता आयोजना गरिएको हो ।

शुक्रबार भएको लिग चरणका भलिबल खेलहरुमा बागलुङ, पर्वत, स्याङ्जा, कास्की र नवलपुरका भलिबल संघका टिमबीच प्रतिस्पर्धा भएको थियो । पश्चिमाञ्चल क्षेत्रीय भलिबल संघ र जिल्ला भलिबल संघको आयोजनामा भएको पुरुष भलिबलको उद्घाटन खेलमा बागलुङले कास्कीलाई सोझो सेटको अन्तरमा पराजित गर्दै सेमिफाइनलको यात्रा तय गरेको छ । बागलुङले कास्कीलाई २५–२२, २५–१९ र २५–१६ ले पराजित गरेको हो ।

स्याङ्जा, बागलुङ, पर्वत र नवलपुर सेमीफाइनलमा प्रवेश गरेका छन् । यसअघि सम्पन्न लिग चरणका खेलमा पर्वतले बागलुङलाई ३–० को सोझो सेट र पर्वतले दोस्रो खेलमा कास्कीलाई ३–१ को सेटमा पराजित गर्दै सेमीफाइनलको यात्रा तय गरेको छ ।

शुक्रबार नै भएको लिग चरणमा स्याङ्जाले नवलपुरलाई ३–१ को सेटमा पराजित गरेको थियो । शनिबार हुने सेमीफाइनलमा पर्वतले नवलपुरसँग तथा स्याङ्जाले बागलुङसँग सेमीफाइनलमा भिड्ने भएको आयोजक नेपाल भलिबल संघले जनाएको छ ।

शनिबार पोखरा रंगशाला पुरुषतर्फको सेमीफाइनल र फाइनलका खेल सञ्चालन हुनेछन् भने एपीएफ र न्यु डायमन्डबीच महिला टिमको प्रदर्शन खेल हुने संघका सचिव डिवी नेपालीले जानकारी दिएका छन् । अरुणालाई जिताउन उनको गृहजिल्ला म्याग्दीमा समेत कार्यक्रम भएका छन् भने हालसम्म करिब ४ लाखभन्दा वढी रकम संकलन भइसकेको छ ।

प्रकाशित समय ०७:२५ बजे