न्यूयोर्क राज्यले ट्रम्पको एउटा परोपकारी संस्थाले एक दशकभन्दा बढी समयदेखि कानुन मिचेको भन्दै कारबाहीको प्रक्रिया अघि बढाएको छ ।
न्यूयोर्ककी महान्यायाधिवक्ता बार्बरा अन्डरवुडले ट्रम्प फाउन्डेशनले डोनल्ड ट्रम्पको तर्फबाट ‘लगभग चेकबुकको जस्तै काम गरेर’ विभिन्न व्यवसाय र गैरसरकारी संस्थाहरूलाई कानुनको बेवास्ता गर्दै जथाभावी रकम तिरेको आरोप लगाएकी छन् । उनले तयार पारेको अभियोगपत्रमा विगत एक दशकदेखि ट्रम्प फाउन्डेसनले त्यस्तै शैलीमा काम गरेको उल्लेख गरिएको छ ।
ट्रम्प फाउन्डेसनले भने विज्ञप्ति जारी गर्दै ती आरोपहरू अस्वीकार गरेको छ ।
राष्ट्रपति ट्रम्पले उनकै शव्दमा न्यूयोर्कका ‘फोहोरी डेमोक्र्याटहरुले’ उक्त मुद्दा अघि सारेको आरोप लगाएका छन् ।
न्यूयोर्ककी महान्यायाधिवक्ता बार्बरा अन्डरवुडले डोनाल्ड ट्रम्प र उनको व्यापारिक साम्राज्यविरुद्ध जारी फौजदारी अनुसन्धानमा एउटा नयाँ मोर्चा खुला गरिदिएकी जनाइएको छ ।
ट्रम्प फाउन्डेसनसँग सम्बन्धित अनियमितताका आरोप सन् २०१६ को राष्ट्रपति चुनावमा पनि बाहिर आएका भए पनि त्यसलाई राष्ट्रपति ट्रम्पको सुरूवाती कार्यकालले छायाँमा पारिदियो । तर, अब त्यो अवस्था बदलिन लागेको जस्तो देखिएको बीबीसीले उल्लेख गरेको छ ।

प्रकाशित समय १२:२८ बजे