दसैं नजिकिँदै गर्दा गोरखाको विकट उत्तरी क्षेत्रका लागि सरकारले सहुलियतमा दिने गरेको चामल अझैसम्म पुग्न सकेको छैन ।

उत्तरी क्षेत्रका साविकका १३ गाविसका स्थानीयवासीलाई सहुलियत दरमा बिक्री गर्न लैजानुपर्नेमा आर्थिक वर्ष सुरु भएको साढे ३ महिना बितिसक्दा पनि चामल ढुवानी हुन नभएको हो । नेपाल खाद्य संस्थान गोरखाले चामल ढुवानी गर्न असारमै टेण्डर आह्वान गरेको भए पनि टेण्डर प्रक्रिया पूरा नहुँदा चामल ढुवानी हुननसकेको संस्थानका डिपो प्रमुख शिवराज घिमिरले बताए ।

संस्थानले माछाखोला डिपोका लागि ठेक्का प्रक्रिया पूरा गरेको भए पनि त्यहाँ समेत अझै सम्झौता हुन बाँकी छ । समयमा सम्झौता हुन नसक्दा माछाखोला डिपोमा पनि दशैँअघि चामल नपु्रग्ने भएको छ । माछाखोला डिपोमा चालु आर्थिक वर्षका लागि मात्र २५ सय क्विन्टल चामल ढुवानी गर्नुपर्नेछ ।

गोरखा सदरमुकामदेखि आरुघाटको सोतीबजारसम्म यातायात साधन प्रयोग गरी चामल ढुवानी हुने भए पनि सोती बजारदेखि माथि खच्चडलाई बोकाएर लैजानुपर्ने बाध्यता छ । खाद्य संस्थान गोरखाले माछाखोला डिपोबाट वितरण गर्ने अनुदानको चामल जिल्लाको साविकका केरौजा, उहिया, काशीगाउँ, लापु, गुम्दा र लाप्राकका साविक गाविसका बासिन्दालाई वितरण गर्दै आएको छ ।

त्यस्तै सिर्दिवास डिपोबाट वितरण गरिने चामल सिर्दिवास, ल्हो, प्रोक, छेकम्पार, चुम्चेत, सामागाउँका बासिन्दालाई वितरण गरिदै आएको छ ।

संस्थानको सिर्दिवास डिपोमा १०३ क्विन्टल र माछाखोला डिपोमा ७९० क्विन्टल चामल मौज्जाद रहेको डिपो प्रमुख घिमिरेले जानकारी दिए । (रासस)

प्रकाशित समय १२:०२ बजे