श्रीमतीको हत्या अभियोगमा पुर्पक्षका लागि कारागार चलान भएका एक युवकले कारागारभित्रै आत्महत्या गरेका छन् । मंगलबार राति कारागारको शौचालयको झ्यालमा जुत्ताको लेसको पासो लगाई उनले आत्महत्या गरेको दोलखा प्रहरीले जानकारी दिएको छ ।

कालिन्चोक गाउँपालिका ५ लापिलाङ घर भएका २४ वर्षीय च्याङा शेर्पाले गए राति आत्महत्या गरेको जिल्ला प्रहरी कार्यालय दोलखाका प्रहरी नायव उपरीक्षक वासुदेव पाठकले जानकारी दिए ।
च्याङाकी श्रीमती लक्की भनिने सर्किनी शेर्पा गत पुस १६ गते चरिघ्याङस्थित आफ्नै कोठामा झुण्डिएको अवस्थामा मृत भेटिएपछि सर्किनीको हत्या अभियोगमा उनका पति च्याङालाई पुस २० गते प्रहरीले पक्राउ गरेको थियो ।

हत्या अभियोगमा पक्राउ परेका उनलाई जिल्ला अदालत दोलखाले मंगबारनै पुर्पक्षका लागि थुनामा पठाएको थियो । अदालतले थुनामा पठाएकै राति उनले कारागारको शौचालयमा झुण्डिएर आत्महत्या गरेका हुन् । मध्यराति शेर्पा शौचालय गएको र लामो समयसम्म नफर्किए पछि खोजतलास गर्दा साँढे १२ बजे शेर्पालाई शौचालयको झँयालमा झुण्डिएको अवस्थामा फेला पारिएको प्रहरी प्रमुख पाठकले जानकारी दिए ।

मृतकका आफन्तले प्रहरीको लापारबाही देखिएको भन्दै बुधबार दिनभर जिल्ला प्रहरी कार्यालय अगाडी धर्ना दिए ।

प्रकाशित समय १०:४२ बजे