लामो समय कार्यालयमा बिताएर घर पुग्नेबित्तिकै ओछ्यानमा पल्टेर टेलिभिजन हेर्नेलाई हृदयरोगको सम्भावना धेरै हुने एक अनुसन्धानले देखाएको छ । कार्यालयबाट घर पुगेर कपडा फेरेर टेलिभिजन खोल्नु हृदयका लागि हानिकारक देखिएको हो ।

कार्यालयबाट फर्कनेबित्तिकै ओछ्यानमा पनि जानु फाइदाजनक हुँदैन । लामो समय कार्यालयमा बसेर काम गर्दा टेलिभिजन हेर्दाजस्तो खतरा हुँदैन । अमेरिकाको कोलम्बिया विश्वविद्यालयको अनुसन्धानले यो कुरा पुष्टि गरेको छ ।

अध्ययनअनुसार खाली समयमा बसेर टेलिभजन हेर्नाले हृदय रोग र मृत्युको जोखिम बढी हुन्छ । यस्तै एउटा रिपोर्ट जर्नल अफ दि अमेरिकन हर्ट एसोसिएसनमा पनि प्रकाशित भइसकेको छ । हल्का वा फुर्तिला व्यायामपछि टेलिभिजन अघि बसेर हानिकारक प्रभाव कम गर्न सकिने यस वैज्ञानिक अध्ययनबाट पुष्टि भएको छ ।

लेखक किथ एम डियाजका अनुसार कार्यालयबाहिर बिताउने समयले तपाईंको स्वास्थ्य अवस्थाबारे जानकारी दिन्छ । कार्यालयमा लामो समय बस्नेले घर पुगेर सामान्य वा विशेष व्यायाम गर्दा हृदय रोगबाट हुनसक्ने खतराको जोखिम कम गर्न सकिन्छ । अधिक टेलिभिजन हेर्नेहरुले शारीरिक मेहनत पनि बढी गर्नुपर्छ ।

अध्ययनकर्ताका अनुसार जति समय टेलिभिजन हेरिन्छ, त्योभन्दा बढी समय व्यायाम गर्नु वा छिटोछिटो हिँड्ने गर्नुपर्छ । यसो गर्नाले हृदयाघात वा मृत्युको खतरा कम हुन्छ । दिनमा चार घण्टा टेलिभिजन हेर्नेहरुले सातामा कमसेकम १५० मिनेट शारीरिक व्यायाम गर्ने हो भने हृदय रोग वा मृत्युको खतरा नहुने अध्ययनहरुको निष्कर्ष छ ।

डा. गौरव गुप्ताका अनुसार बिहान र साँझ घुम्न निस्कनेहरुको स्वास्थ्यमा यस प्रकारको समस्या हुँदैन । दिनभर कार्यालयमा बसेर गरेको कामको थकान मेट्न ओछ्यानमा पल्टनेहरुलाई चिकित्सकहरुले चेतावनी दिएका छन् । यसरी सुतेर टेलिभिजन हेर्नुभन्दा परिवारका सदस्यसँग समय बिताउनु स्वास्थ्यका लागि राम्रो हुने उनीहरुका सुझाव छ । (एजेन्सी)

प्रकाशित समय ११:४० बजे