तीव्र रूपमा कोरोना भाइरस फैलिएर २४ संक्रमित पुगेको उदयपुर जिल्ला त्रियुगा नगरपालिका- ३, भुल्के क्षेत्र र त्रियुगा नगर आसपास क्षेत्रमा अहिले थप अन्य व्यक्तिको जाँच गर्ने उपकरण अभाव भएको छ ।

जिल्ला स्वास्थ्य कार्यालय उदयपुरका अनुसार तीव्र रूपमा भुल्के र त्रियुगा क्षेत्रमा कोरोनाको संक्रमण फैलँदै गएको भए पनि सबै स्थानीय नागरिकको स्वाब नमूना संकलन गर्न विभिन्न उपकरणको अभाव हुँदा समस्या रहेको हो । स्वास्थ्य कार्यलय उदयपुरका प्रमुख मोहन सुवेदीका अनुसार उदयपुरको मात्र नभएर नेपालकै कोरोना संक्रमणकाे केन्द्रविन्दु बनेको भुल्के गाउँमा अहिले ५६ घर मुस्लिम र अन्य समुदायका २२५ घर गरेर झण्डै ६५० जनसंख्या रहेको छ ।

अहिलेसम्म प्रदेश जनस्वास्थ्य विभागबाट ६९ र नेपाली सेनाबाट २५० गरेर ३१९ जनाको मात्र स्वाब नमूना संकलन गरिएको स्वास्थ्य कार्यालय उदयपुरले बताएको छ । तीन सय १९ जनाको स्वाब नमूना परीक्षण गर्दा २४ मा संक्रमण देखिएका कारण अन्य स्थानीय बासिन्दाको पनि स्वाब नमूना संकलन गर्नुपर्ने देखिएको र दबाव भए पनि सोहीअनुसार आइरहेको स्वास्थ्य कार्यालय उदयपुरले बताएको छ ।

कोरोनासम्बन्धी स्वाब नमूना संकलन गर्ने कुनै उपकरण नभएको कारण प्रदेश र संघीय सरकारको मुख ताक्नुबाहेक विकल्प नरहेको पनि स्वास्थ्य कार्यलय उदयपुरका प्रमुख सुवेदी बताउँछन् । अहिले भुल्केवासी र गाईघाट बजारवासीले दिनानुदिन कोरोनाको संक्रमण स्थानीयवासीमा देखिने र पुष्टि हुँदै गएपछि छिटोभन्दा छिटो सबै अन्य स्थानीयवासीको पनि स्वाब नमूना संकलन गरेर परीक्षण गर्नुपर्ने माग गरेका छन् ।

भुल्केमा अहिले कोरोना संक्रमित भएका २४ मध्ये १० जना सोही स्थानका स्थानीय बासिन्दा रहेको र धेरै भुल्केका कोरेना संक्रमित स्थानीयवासी गाईघाट बजारमा विभिन्न पसल सञ्चालन गर्ने र सब्जी व्यापार गर्ने गरेको गाईघाट वडा नं १२ का वडाध्यक्ष जयविक्रम राईले बतए । अब भुल्केमात्र नभएर कोरोनाको आशंकामा सम्पूर्ण गाईघाटवासीको स्वाब नमूना संकलन गर्नुपर्ने अवस्था आएको र आफूहरुको माग रहेको गाईघाटका स्थानीयवासी बताउँछन् ।

यता त्रियुगा नगरपालिकाका प्रमुख बलदेव चौधरीले भने आवश्यक परे नगरका अन्य क्षेत्रका नागरिकमा पनि कोरोनासम्बन्धी परीक्षण गराउन आफूले अहिले प्रदेश र संघीय सरकारसँग अनुरोध गरिरहेको बताए । उदयपुरमा अहिले भुल्के क्षेत्र मात्र नभएर जिल्लाको चौदण्डी नगरपालिकाको सिवाइको मस्जिद क्षेत्र, जामे मस्जिद र त्रियुगा नगरपालिकाकै देउरी मस्जिदमा समेत भित्रभित्रै कोरोना फैलिएको हुनसक्ने कारण पनि तीव्ररूपमा कोरोना परीक्षणका लागि उपकरण आवश्यक रहेको स्वास्थ्य कार्यालय उदयपुरले बताएको छ । कोरोना जाँच र स्वाब नमूना संकलन गर्ने उपकरण र सामग्री अभाव रहेको उनले बताए ।

गत शुक्रबारमात्रै भुल्केको नुरी मस्जिदमा लुकेर बस्दै आएका १२ भारतीय मुस्लिम नागरिकमा पहिलोपटक कोरोनाको संक्रमण देखिएको थियो । यस्तै विराटनगर घर भई भुल्केमा अस्थायी रूपमा बस्दै आएका अर्का नेपाली नागरिकमा कोरोना संक्रमण पुष्टि भएको थियो भने मंगलबार बिहान भुल्केका आठ जनामा कोरोना संक्रमण पुष्टि भएको थियो । मंगलबार बेलुकी तीन जनामा कोरोना संक्रमण पुष्टि भएको स्वास्थ्य कार्यलय उदयपुरले बताएको छ । (रासस)

प्रकाशित समय १३:५७ बजे