गण्डकी प्रदेश सरकारले कोरोना भाइरसका कारण सर्वसाधारणमा परेको मनोवैज्ञानिक असर समाधान गर्न मनोवैज्ञानिक परामर्श कार्यक्रम सञ्चालन गर्ने भएको छ । आर्थिक वर्ष २०७७/७८ को वार्षिक नीति तथा कार्यक्रममा सरकारले कोरोना संक्रमणको रोकथाम र नियन्त्रणका साथै यसबाट सिर्जित विभिन्न समस्याको समाधानको प्रयास थालेको हो ।

कोरोना परीक्षणलाई व्यापक विस्तार गर्ने र निःशुल्क परीक्षण तथा उपचार गर्ने कार्यलाई निरन्तरता दिइने उल्लेख गर्दै नीति तथा कार्यक्रममा यसबाट नागरिकको रक्षा गर्न सर्वसुलभ तथा गुणस्तरीय स्वास्थ्य सेवा सुनिश्चित गर्ने र यसविरुद्ध लड्न स्वास्थ्य प्रणालीलाई सुदृढ गरिने उल्लेख छ ।

ज्याला मजदुरी गरी जीवन गुजारा गर्ने र विपन्न व्यक्तिलाई लकडाउनको अवधिमा जीवन निर्वाहका लागि स्थानीय तहसँगको सहकार्यमा राहत तथा रोजगारी उपलब्ध गराइने प्रदेश प्रमुख अमिक शेरचनले बताए । महामारीबाट प्रभावित दैनिक ज्यालादारी गर्ने मजदुर, महिला, दलित, गरिब तथा सीमान्तकृत, असहाय तथा अपांगता भएका व्यक्ति, ज्येष्ठ नागरिकको हित संरक्षण गर्न विशेष कार्यक्रम ल्याउने सरकारको तयारी छ ।

पर्यटन, कृषि, उद्योग, यातायात, निर्माणलगायतमा महामारीले पारेको असरका आधारमा क्षेत्रगत पुनरूत्थानका विशेष कार्यक्रम सञ्चालन गर्ने तयारी गरिएको छ । रोजगारी गुमाएका, विदेश जान रोकिएका र विदेशबाट फर्किएका व्यक्तिको श्रम, पुँजी, सीप र रुचिका आधारमा पर्यटन, कृषि, उद्योग, यातायात, निर्माणलगायतका क्षेत्रमा आवश्यकताअनुसार प्राविधिक तथा व्यावसायिक तालिम, प्रविधि तथा बीउपुँजी प्रदान गरी उद्यमशीलता विकास तथा स्वरोजगारी र रोजगारी प्रवर्धनका कार्यक्रम सञ्चालन गरिने सरकारले जनाएको छ ।

महामारीबाट प्रभावित उद्यमीलाई सहुलियतदरमा आवश्यक यन्त्र तथा उपकरण उपलब्ध गराउने र सहुलियत कर्जाका लागि बैंक तथा वित्तीय संस्थासँग समन्वय गरिने नीति तथा कार्यक्रममा जनाइएको छ ।

स्वास्थ्य सुरक्षा सामग्री सहयोग

जिपी कोइराला फाउन्डेसन कास्कीले नेपाल प्रेस युनियन कास्कीलाई स्वास्थ्य सुरक्षा सामग्री प्रदान गरेको छ । बढ्दो कोरोना संक्रमणका बीच नागरिकलाई सुसूचित गराउन सक्रिय सञ्चारकर्मीको स्वास्थ्य सुरक्षाका लागि सामग्री प्रदान गरिएको हो ।

कार्यक्रममा फाउन्डेसनका गण्डकी प्रदेश संयोजक शारदा पौडेलले प्रेस युनियन कास्कीका अध्यक्ष नवीन सिग्देललाई मास्क, पञ्जा र स्यानिटाइजर हस्तान्तरण गरे । मुलुकलाई सही ढंगबाट अघि बढाउन पत्रकारिता सशक्त हुनुपर्ने उनले बताए । स्वास्थ्य नै धन भएकाले हरेक व्यक्ति, परिवार र समाजले सावधानी र सतर्कता अपनाउनुपर्ने उनको भनाइ छ । (रासस)

प्रकाशित समय १०:५९ बजे