देशका विभिन्न ठाउँमा स्रोत पत्ता नलागेका कोरोना संक्रमित फेला पर्न थालेका छन् । पछिल्लो २४ घन्टामा १ सय ३९ जनामा कोरोना भाइरसको संक्रमण देखिएको स्वास्थ्य तथा जनसंख्या मन्त्रालयले जनाएको छ । यसमध्ये ललितपुरका ३ र काठमाडौंका ३ जना रहेका छन् ।

सोमबारको नियमित पत्रकार सम्मेलनमा मन्त्रालयका प्रवक्ता डा. जागेश्वर गौतमले थपिएका १ सय ३९ जनासहित देशभर संक्रमितको संख्या १८ हजार ७ सय ५२ पुगेको जानकारी दिए । यसमध्ये सक्रिय संक्रमितको संख्या ४ हजार ९५० रहेको पनि प्रवक्ता गौतमले बताए ।

सोमबार निको भएर ६२६ जना संक्रमित अस्पतालबाट डिस्चार्ज भएका छन् । हालसम्म १३ हजार ७५४ जना डिस्चार्ज भइसकेको मन्त्रालयले जनाएको छ ।

हालसम्म ४८ जनाले कोरोनाभाइरसको संक्रमणबाट ज्यान गुमाएका छन् । यस्तै पाँचथर,भोजपुर, संखुवासभा, रसुवा, मनाङ र मुस्ताङ कोरोना संक्रमणमुक्त भएको मन्त्रालयले जानकारी दिएको छ ।

प्रकाशित समय १६:२६ बजे