काठमाडौँ उपत्यकामा आज थप १३४ जनामा कोरोना संक्रमण पुष्टि भएको छ । जसमा काठमाडौँका १ सय १०, ललितपुरका १४ र भक्तपुरका १० जना रहेका छन् । योसँगै उपत्यकामा कोरोना संक्रमितको संख्या १३ सय ४४ पुगेको छ ।

लकडाउन अन्त्य भएसँगै काठमाडौँलगायत देशैभर संक्रमण दर ह्वात्तै बढेको छ । संक्रमित थपिएसँगै काठमाडौँमा जोखिम बढ्न थालेको स्वास्थ्य तथा जनसंख्या मन्त्रालयले जनाएको छ ।

सोमबार काठमाडौँमा ३६, भक्तपुरमा ४ र ललितपु्रमा ४ गरी उपत्यकाभित्र ४४ जनामा संक्रमण पुष्टि भएको थियो । त्यसअघि उपत्यकामा ९२ जना संक्रमित भेटिएका थिए । आइतबार थपिएका संक्रमितहरु काठमाडौंका ९० र ललितपरका २ जना हुन् ।

त्यसअघि साउन २४ मा उपत्यकाभर ५६ जनामा कोरोना संक्रमण देखिएको थियो । स्वास्थ्य तथा जनसंख्या मन्त्रालयका अनुसार त्यस दिन काठमाडौंमा ५०, भक्तपुरमा ३ र ललितपुरमा ३ जनालाई संक्रमण पुष्टि भएको हो ।

साउन २३ मा काठमाडौँमा १०६ संक्रमित थपिएका थिए । यसमा काठमाडौंमा ८८, भक्तपुरमा ८ र ललितपुरमा १० छन् । साउन २१ मा काठमाडौंमा ६२ जनामा संक्रमण पुष्टि भएको थियो । जसमा ललितपुरमा ५, काठमाडौंमा ५७ छन् । २० साउनमा काठमाडौँमा ६२ जनामा संक्रमण देखिएको थियो ।

हालसम्म उपत्यकाभित्र सबैभन्दा बढी संक्रमित काठमाडौँका रहेका छन् । काठमाडौँमा एक हजार ५८ जनालाई कोरोना संक्रमण पुष्टि भइसकेको छ । त्यसैगरी ललितपुरमा एक सय ८७ र भक्तपुरमा ९९ जना संक्रमित भेटिएका छन् ।

देशभर आज थप ६३८ जनामा संक्रमण पुष्टि भएको छ । योसँगै नेपालमा कुल कोरोना संक्रमितको संख्या २३ हजार ९ सय ४८ पुगेको छ । हालसम्म १६ हजार ६ सय ६४ जना संक्रमणमुक्त भई घर फर्किएका छन् । नेपालमा ८३ जनाले कोरोनाभाइरसका कारण ज्यान गुमाइसकेको मंगलबारको नियमित प्रेस ब्रिफिङमार्फत मन्त्रालयले जानकारी दिएको छ ।

प्रकाशित समय १७:४४ बजे