गत २४ घण्टामा देशभर १० हजार ८० जनाको पीसीआर परीक्षण गर्दा १३५१ जनामा कोरोनाभाइरस संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार अब देशभर संक्रमितको संख्या ७४ हजार ७ सय ४५ पुगेको छ ।

हाल देशभर सक्रिय संक्रमितको संख्या १९ हजार ६२४ पुगेको सोमबारको नियमित प्रेस ब्रिफिङमा मन्त्रालयका प्रवक्ता डा. जागेश्वर गौतमले जानकारी दिए । यस्तै आज देशभर ८ हजार ६९५ संस्थागत आइसोलेशन र १० हजार ९२९ जना होम आइसोलेशनमा रहेका छन् ।

उनका अनुसार बितेको २४ घण्टामा थप ७४२ जना निको भएका छन् । यससँगै निको हुनेको कुल संख्या ५४ हजार ६४० पुगेको प्रवक्ता गौतमले बताए ।

थप ४ जनाको मृत्यु

कोरोना भाइरसको संक्रमणबाट पछिल्लो २४ घन्टामा ४ जनाको ज्यान गएको छ । मन्त्रालयले दिएको जानकारीअनुसार सुनसरीमा ३८ वर्षीया महिला र भक्तपुरमा ५१ वर्षीया महिलाको ज्यान गएको छ । त्यस्तै गुल्मीमा ३४ वर्षीय पुरुष र बाँकेमा ४७ वर्षीय पुरुषको पनि कोरोना संक्रमणबाट ज्यान गएको हो । हालसम्म नेपालमा काेराेनाका कारण ४८१ जनाको ज्यान गइसकेकाे छ ।

काठमाडौं उपत्यकामा ८१७ जना थपिए

पछिल्लो २४ घण्टामा काठमाडौं उपत्यकामा ८१७ जना कोरोना संक्रमित थपिएका छन् । मन्त्रालयका अनुसार काठमाडौं जिल्लाका ६४९ जनामा कोरोना संक्रमण पुष्टि भएको छ । यस्तै ललितपुरका १३२ र भक्तपुरका ३६ जनामा संक्रमण देखिएको छ ।

यस्तै पछिल्लो २४ घण्टामा उपत्यकामा थप एक जनाको मृत्यु भएको छ । भक्तपुरकी ५१ वर्षीया महिलाको मृत्यु भएको मन्त्रालयले जनाएको छ ।

प्रकाशित समय १६:३० बजे