चिकित्सक गोविन्द केसीले चिकित्सा शिक्षा विद्येयक तत्काल पारित गर्न माग गरेका छन् । सोमबार विज्ञप्ती जारी गर्दै उनले १५ औं अनशनको क्रममा भएको सम्झौता अनुसार विधेयक पारित गर्न माग गरेका हुन् । उनले विद्येयक पास नभए जानकारी बिनै १६ औं अनशन बस्ने चेतावनी दिएका छन् ।

उनले शिक्षा मन्त्री गिरिराजमणि पोखरेलकै कारण संसदबाट विधेयक पास नभएको आरोप लगाएका छन् । तर, मन्त्री पोखरेलले भने आफ्नो कारण विधेयक पास नभएको भन्ने हल्लामा सत्यता नभएको बताउँदै आएका छन् । उनले अर्को अधिवेशनबाट विधेयक पास हुने बताएका छन् ।

डा. केसीले जारी गरेको विज्ञप्तीमा भनिएको छ, ‘सयाैंको संख्यामा सिटिइभिटी, नर्सिङ लगायतका कलेजहरु कार्यक्रम सञ्चालनको स्वीकृतीको पर्खाइमा छन्, त्यसमा शिक्षा मन्त्रीको प्रत्यक्ष स्वार्थ गाँसिएको छ ।’ आर्थिक लाभ लिनको लागि मनत्री पोखरेलले विधेयक पास नभएको डा. केसीले आरोप लगाए ।

यसअघि, डा. केसीले मन्त्री पोखरेलको राजिनामा माग गरेका थिए । त्यस्तै डा. त्रिविका उपकुलपति तिर्थ खनिया सहितका व्यक्तिलाई कारबाही गर्न समेत माग गरेका छन् । उनले गौरीबहादुर कार्की आयोगले सिफारिस गरे बमोजिम उनीहरुलाई कारबाही गर्न आग्रह गरेका छन् ।

शिक्षा मन्त्रालयबाट शनिबार जारी भएको दुई विज्ञप्तीको समेत डा. केसीले ध्यानकर्षण जनाएका छन् । ‘मन्त्रीको निहित स्वार्थ पूर्तिका लागि मन्त्रायल तथा मन्त्रालयका कर्मचारीहरुको प्रयोग हुनु तथा भ्रमपूर्ण विज्ञप्ती जारी गरिनु दुर्भाग्यपूर्ण छ ।’ उनको विज्ञप्तिमा उल्लेख छ ।

प्रकाशित समय १६:०८ बजे