संघीय संसद सञ्चालनको तयारीस्वरूप बिहीबार २०३ जना सांसदसहित ४३३ जनाको कोरोना परीक्षणका लागि स्वाब संकलन गरिएको छ । संघीय संसद भवनको ल्होत्से हलमा बिहीबार बिहान १० बजेदेखि सांसद तथा संसदका कर्मचारीहरूको सांसदहरुको पीसीआर विधिबाट कोरोना परीक्षणका लागि स्वाब संकलन गरिएको हो ।

स्वाब संकलनमा प्रतिनिधि सभातर्फका १७० जना र राष्ट्रिय सभातर्फका ३३ जना सांसद सहभागी भए । संकलित स्वाब परीक्षणका लागि टेकुको राष्ट्रिय जनस्वास्थ्य प्रयोगशाला पठाइएको छ । रिपोर्ट शुक्रबार दिउँसोसम्म आउने जनाइएको छ । रिपोर्ट नेगेटिभ आएका सांसदहरू मात्रै बैठक कक्षमा प्रवेश गर्न पाउनेछन् ।

प्रतिनिधि सभामा २७५ र राष्ट्रिय सभामा हाल ५८ जना सांसद छन् । बिहीबार स्वाब संकलनमा छुटेका सांसदको भोलि बिहान साढे ८ बजेदेखि परीक्षण गरिने संसद सचिवालयले जनाएको छ ।

संसदको बजेट अधिवेशन शुक्रबारबाट सुरु हुँदैछ ।

प्रकाशित समय १५:३७ बजे