जावलाखेलस्थित अल्का अस्पतालमा कार्यरत गीता केसी लेलेस्थित जंगलमा मृत फेला परेकी छन् । उनी चार दिनदेखि सम्पर्कविहीन रहेको बताइएको छ ।

उनको शुक्रबार साँझ गोदावरी नगरपालिका- १० लेलेस्थित सामुदायिक वनमा शव फेला परेको प्रहरीले जनाएको छ । ३९ वर्षीया केसीको हत्या भएकाे हुनसक्ने प्रहरीको प्रारम्भिक अनुमान छ । केसी अल्का अस्पतालमा हाउस किपरको रूपमा कार्यरत थिइन् ।

हत्या आशंकामा केसीको भतिजा निर्मल केसी पक्राउ परेकाे महानगरीय प्रहरी परिसर ललितपुरले जनाएकाे छ । घटनाबारे थप अनुसन्धान भइरहेको परिसरका एसएसपी टेकप्रसाद राईले बताए ।

अस्पताल जाने भन्दै गीता घरबाट निर्मलसँगै हिँडेको परिवारका सदस्यहरूले बताएका छन् । बेलुका अबेरसम्म पनि घर नफर्केपछि अस्पतालमा सोधखोज गर्दासमेत उनी अस्पताल नआएको जानकारी पाएलगत्तै परिवारले प्रहरीकहाँ उजुरी दिएका थिए ।

प्रकाशित समय १४:२० बजे