भारतको गुजरातमा आगलागी हुँदा १५ बालबालिकासहित २० जनाको ज्यान गएको छ । सुरतस्थित एक व्यावसायिक भवनमा आगो लाग्दा उनीहरुको मृत्यु भएको हो ।

गुजरातका अधिकारीलाई उद्धृत गर्दै बीबीसी हिन्दीले २० जनाको जलेर मृत्यु भएको पुष्टि गरेको छ । शुक्रबार साँझपख कोचिङ कक्षा चलिरहेको सो भवनमा आगलागी भएको थियो । ज्यान बचाउन भवनको तेस्रो तथा चौथौ तलाबाट हाम फाल्ने क्रममा उनीहरुको मृत्यु भएको बिबिसीले उल्लेख गरेको छ ।

तक्षशिला कम्प्लेक्सको तेस्रो र चौथो तलामा आगो लागेको हो । भारतीय अधिकारीका अनुसार घटनास्थलमा दमकल विभागका १९ वाहनले आगो नियन्त्रणमा लिएका थिए ।

घटनालाई लिएर प्रधानमन्त्री नरेन्द्र मोदीले दुःख व्यक्त गरेका छन् । गुजरातका मुख्यमन्त्री विजय रूपाणीले पनि घटनाप्रति शोक जनाउँदै सरकारले मृतकका परिवारका लागि जनही ४ लाख भारतीय रुपैयाँ सहयोग दिने घोषणा गरेका छन् ।

प्रकाशित समय ०८:१० बजे