रूसको साइबेरिया क्षेत्रमा शनिबार एक सुन खानी भत्किँदा कम्तीमा १५ जनाको मृत्यु भएको रूसी अधिकारीले बताएका छन् । घटनामा कम्तीमा १३ जना पुरिएर वेपत्ता भएका बताइएको छ ।

गैरकानुनी रूपमा सुन निकाल्न साइबा नदीमा बनाइएको गैरकानुनी बाँध भत्किँदा क्रास्नोभार्स्कोस्थित खानीमा काम गर्ने श्रमिकको मृत्यु भएको रूसले जनाएको छ । खानीमा काम गर्ने श्रमिक सुतिरहेको समय बाँध फुटेर आएको हिलोसहितको पानीले उनीहरूलाई बगाएको रूसी सञ्चारमाध्यमहरूले बताएका छन् ।

घटनापछि करिब ३०० उद्धारकर्मी र ६ हेलिकप्टर खानीमा पुगेका र बेपत्ताहरूको खोजी भइरहेको रूसी विपद् व्यवस्थापन मामिला हेर्ने मन्त्रालयले जानकारी गराएको छ । तर घटनास्थल निकै दूरदराजमा रहेकोले उद्धार प्रयास निकै कठिन भएको अधिकारीहरूले बताएका छन् ।

घटनामा परी घाइते बनेका १४ जनालाई अस्पताल पठाइएको र तीमध्ये दुईजनाको अवस्था निकै गम्भीर रहेको बताइएको छ । रूसका हिमाली तथा पहाडी क्षेत्रमा गैरकानुनी रूपमा सञ्चालनमा रहेका खानीहरूमा आवश्यक सुरक्षामा ध्यान नपु–याइँदा बर्सेनि सयौँ श्रमिकको अकालमा ज्यान जाने गरेको छ ।

प्रकाशित समय ०९:०५ बजे