कोरोना भाइरस महामारी फैलिन नदिने उद्देश्यले जर्मनीले घर तथा कार्यालयबाहेक अन्यत्र दुई जनाभन्दा धेरै जम्मा हुन नपाइने नियम लागू गरेको छ ।

त्यहाँ चान्सलर एङ्गेला मेर्कलको सम्पर्कमा आएका एक चिकित्सकलाई कोरोना भाइरस संक्रमण भएको पाइएपछि उनी पनि क्वारेन्टाइन अर्थात् एकान्तवासमा गएको उनका प्रवक्ताले बताएका छन् । जर्मनीले कोरोनाभाइरस प्रकोप नियन्त्रणका निम्ति सामाजिक अन्तक्र्रियाहरूमा थप रोक लगाउँदै दुई जनाभन्दा धेरैको सार्वजनिक जमघटमा प्रतिबन्ध लगाएको छ ।

टेलिभिजनमा प्रसारित सम्बोधनमा चान्सलर मेर्कलले संक्रमणको दर घटाउन आफ्नै व्यवहार सबभन्दा प्रभावकारी माध्यम भएको बताइन् । उनले घोषणा गरेका नियमानुसार केशशृङ्गार गृह एवम् ब्यूटी तथा मसाज पार्लर पनि बन्द हुनेछन् । अन्य अनावश्यक पसलहरू यसअघि नै बन्द गराइएका थिए।

‘नयाँ नियमहरू निकै नै कडा छन् । सार्वजनिक स्थानमा एक अर्काभन्दा डेढ मिटर, अझ दुई मिटरको दूरीमा रहनुपर्ने अनिवार्य गरिएको छ । तपाईं कार्यालय वा चिकित्सककहाँ जान सक्नुहुन्छ र स्वच्छ हावाका लागि एक्लै बाहिर निस्किन सक्नुहुन्छ । अन्य लगभग सबै सार्वजनिक जमघट प्रतिबन्धित गरिएको छ,’ संवाददाता डेमियन मक्गिनेजले बताए ।

एंगेला मेर्कलले सम्बोधन गरेको केही समयपछि उनको कार्यालयले उनी स्वयम् क्वारेन्टाइनमा बस्ने बताएको छ । शुक्रवार उनलाई न्युमोनियाको खोप दिएका एक चिकित्सकमा कोरानाभाइरस संक्रमण पाइएपछि उनी क्वारन्टीनमा बस्नुपरेको हो ।

उनको नियमित जाँच गरिने र उनले घरबाटै काम गर्ने मर्कलका प्रवक्ताले बताए । उनी ६५ वर्षकी छन् । युरोपको सबभन्दा ठूलो अर्थतन्त्र जर्मनीमा हालसम्म कोरोनाभाइरस संक्रमणका १८ हजार६१० घटना पाइएका छन् । उक्त भाइरसको संक्रमणबाट लाग्ने रोग कोभिड १९ ले त्यहाँ ५५ जनाको ज्यान गइसकेको छ ।

के छ इटलीको अवस्था ?

महामारी फैलिएयता पहिलो पटक इटलीमा नयाँ संक्रमणको वृद्धि दरमा केही कमी देखिएको छ।आइतवार उक्त वृद्धि दर नौ प्रतिशत रह्यो । बितेका २४ घण्टामा त्यहाँ ६५१ जनाको ज्यान गएको छ । यो संख्या शनिवारको भन्दा कम हो ।

बीबीसीका रोमस्थित संवाददाताका अनुसार इटलीका लागि यो साता सामु महत्त्वपूर्ण छ र यही बेला संक्रमणको दर घट्दै जाला कि नजाला भन्ने प्रस्ट हुनेछ ।

के छ न्यूयोर्कको स्थिति ?

अमेरिकामा कोरोनाभाइरस सङ्क्रमणले निकै प्रभावित भएको न्यूयोर्कका नगरप्रमुख बिल डे ब्ल्याजियोले संघीय सरकारले जनस्वास्थ्य संकटसँग संघर्ष गर्न तदारुकता नदेखाए त्यहाँका अस्पतालमा चाँडै नै अत्यावश्यक सामग्री अभाव हुने चेतावनी दिएका छन् ।

उक्त सहरमा हाल ८ हजार जनाभन्दा धेरैलाई सो संक्रमण देखिएको छ । ब्लाजियोका अनुसार अबको १० दिनमा त्यहाँ सर्जिकल मास्क, भेन्टिलेटर तथा अन्य महत्त्वपूर्ण सामग्रीको अभाव हुनेछ । उनले ट्रम्प प्रशासनले सेना परिचालन गर्नुपर्ने बताए ।

अमेरिकामा ३१ हजार जनामा संक्रमण पुष्टि भएको छ भने ३९० जनाको ज्यान गएको छ । (बीबीसीबाट)

प्रकाशित समय १०:४३ बजे