विश्व स्वास्थ्य संगठन (डब्लुएचओ)को युरोपेली शाखाले बिहीबार युरोपमा भाइरस नियनत्रणका लागि लगाइएका प्रतिबन्ध कम गर्न अझै निकै हतार हुने बताएको छ । डब्ल्युएचओका युरोपका क्षेत्रीय निर्देशक हान्स क्लुगले त्यसैले संक्रमण नियन्त्रणका लागि लगाइएका प्रतिबन्धलाई सहज बनाइहाल्नु गलत हुने बताएका हुन् ।

डब्ल्यूएचओ युरोपेली क्षेत्रका ५३ देशमध्ये जनाले ३० मुलुकमा विगत १४ दिनमा कोभिड- १९ संक्रमितको संख्यामा उल्लेखनीय ह्रास आएको तर अझै पनि यहाँको संक्रमण दर धेरै रहेको उनले उल्लेख गरे । ‘कोभिड- १९ संक्रमण दर युरोपभरि अझै उच्च छ जसका कारण यूरोपेली मुलुकहरूको स्वास्थ्य प्रणालीलाई महामारीले प्रभावित पार्नसक्छ र सेवाहरूलाई तनावपूर्ण बनाउन सक्छ,’ उनले भने ।

यो क्षेत्रको मात्रै तीन प्रतिशत जनसंख्यामा यस पहिले संक्रमण पुष्टि भइसकेको छ । महामारीका कारण यस पहिले नराम्रोसँग प्रभावित भएका क्षेत्रहरूमा संक्रमण पुनः फैलिनसक्ने जोखिम कायम रहने उनले बताए । डब्ल्यूएचओका अनुसार युरोपियन क्षेत्रमा रूस र धेरै मध्य एशियाली देशहरू रहेका छन् । यस क्षेत्रका ३५ राज्यले खोप अभियान सुरु गरेका छन् । (रासस)

प्रकाशित समय १९:१४ बजे