नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ महाराजगञ्जस्थित शिक्षण अस्पताल पुगेर प्रधानमन्त्री केपी शर्मा ओलीको स्वास्थ्यस्थितीको जानकारी लिएका छन् । स्वास्थ्यमा समस्या देखिएपछि सोमबार विहान अस्पताल भर्ना भएका प्रधानमन्त्री ओलीलाई भेट्ट प्रचण्ड अस्पताल पुगेका हुन् ।

रुघाखोकी सामान्य अवस्थामा नआएपछि अस्पताल भर्ना भएका प्रधानमन्त्रीलाई भेट्न प्रचण्ड त्यहाँ पुगेका हुन् । त्यस्तै राष्ट्रियसभाका अध्यक्ष गणेश तिमल्सिना, नेकपाका सचिवालय सदस्य झलनाथ खनाल, महासचिव विष्णु पौडेललगायतका नेताले पनि अस्पताल पुगेर प्रधानमन्त्रीको स्वास्थ्यस्थितिको जानकारी लिएका थिए ।

त्यस्तै गृहमन्त्री रामबहादुर थापा ‘बादल’, शिक्षा, विज्ञान तथा प्रविधिमन्त्री गिरिराजमणि पोखरेल, उद्योग वाणिज्य तथा आपूर्तिमन्त्री मातृकाप्रसाद यादव, प्रदेश नं ५ का मुख्यमन्त्री शङ्कर पोखरेल, नेकपाका नेता भीम रावल, टोपबहादुर रायमाझी, केशव बडाललगायतले पनि प्रधानमन्त्रीको स्वास्थ्य अवस्थाको बारेमा जानकारी लिएका छन् ।

प्रधानमन्त्रीलाई भेटेर बाहिर निस्किएका नेता रायमाझीले प्रधानमन्त्रीको स्वास्थ्य अवस्था राम्रो रहेको र उपचार भइरहेको जानकारी दिए । प्रधानमन्त्रीको मनमोहन काडियोथोरासिस भास्कलुर एण्ड ट्रान्सप्लान्ट केन्द्रमा उपचार भइरहेको छ ।

यसैबीच अस्पतालले प्रधानमन्त्रीको छातीमा संक्रमण देखिएको तथा रगतमा चिनीको मात्रा कम देखिएको जानकारी दिएको छ । सोमबार एक विज्ञप्ती जारी गर्दै अस्पतालले प्रधानमन्त्रीको स्वास्थ्यमा क्रमिक सुधार र अवस्था सामान्य रहेको जनाएको छ ।

प्रकाशित समय १२:१३ बजे