चालू आर्थिक वर्षको १० महिनामा मोरङमा सवारी दुर्घटनाबाट ७८ जनाले ज्यान गुमाएका छन् । चालू वर्षको साउनदेखि वैशाखभित्रमा मात्र विभिन्न सवारीका ५ सय ९३ साधन दुर्घटना हुँदा ७८ जनाको ज्यान गएको हो ।

जिल्ला ट्राफिक कार्यालय मोरङको तथ्यांकअनुसार सो आवधीमा ५२ वटा ट्रक, ५२ सार्वजनिक बस, जिप तथा कार ७०, ट्याक्टर ३१, टेम्पु ३६, मोटरसाइकल ३ सय ८, शारीरिक शक्तिबाट चल्ने ४२ र अन्य २ वटा सवारीका साधन दुर्घटना हुँदा ७८ जनाको मृत्यु, २ सय १२ जना गम्भीर घाइते र ५ सय २१ जना सामान्य घाइते भएका हुन् ।

सबैभन्दा बढी मोटरसाइकल दुर्घटना
चालू आर्थिक वर्षको साउनमा मात्र ५८ वटा सवारी दुर्घटना भएकोमा ८ जनाको मृत्यु भएको छ भने २८ जना गम्भीर र ६७ जना सामान्य घाइते भएका छन् । जिल्ला ट्राफिक कार्यालय मोरङको तथ्यांकअनुसार भदौमा ६५ वटा सवारी साधन दुर्घटना भएकोमा ६ जनाको मृत्यु, २७ जना गम्भीर घाइते र ५५ जना सामान्य घाइते भएका छन् ।

त्यसैगरी, असोजमा ५२ वटा सवारी दुर्घटना भएकोमा ८ जनाको मृत्यु, २० जना गम्भीर घाइते र ३७ जना सामान्य घाइते भएका छन् । कात्तिकमा ६० वटा सावारी साधन दुर्घटना हुँदा ९ जनाको मृत्यु, २२ जना गम्भीर घाइते र ७५ जना सामान्य घाइते भएको जिल्ला ट्राफिक कार्यालय मोरङले जनाएको छ ।

कार्यालयका अनुसार चालू आर्थिक वर्षकै मंसिरमा ७४ वटा सवारी साधन दुर्घटना भएका छन् । उक्त सवारी दुर्घटनामा १० जनाको ज्यान गएको छ भने २० जना गम्भीर घाइते र ७५ जना सामान्य घाइते भएका छन् ।

त्यस्तै, पुसमा ५२ वटा सवारी साधन दुर्घटना हुँदा ७ जनाको मृत्यु, १३ जना गम्भीर र २८ जना सामान्य घाइते भएका छन् । माघमा ५७ वटा सवारी साधन दुर्घटना भएकोमा ७ जनाको मृत्यु, १२ जना शक्त घाइते र ३६ जना सामान्य घाइते भएका छन् ।

त्यसैगरी, फागुनमा ४७ वटा सवारीका साधन दुर्घटना भएका छन् । उक्त दुर्घटनामा ७ जनाको मृत्यु, १९ जना गम्भीर घाइते र ४६ जना सामान्य घाइते भएको तथ्यांकमा उल्लेख छ ।

चालू आर्थिक वर्षको चैतमा ६३ वटा सवारी दुर्घटनामा ७ जनाको मृत्यु, ३५ जना गम्भीर घाइते र ५७ जना सामान्य घाइते भएको जनाइएको छ । वैशाखमा मात्र ६५ वटा दुर्घटना भएका छन्, जसमा १० जनाको ज्यान गएको छ भने १६ जना गम्भीर घाइते र ४५ जना सामान्य घाइते भएको तथ्यांकमा उल्लेख छ । चालू आर्थिक वर्षको वैशाख मसान्तसम्ममा भएका ५ सय ९३ सवारी दुर्घटनामा सबैभन्दा बढी ३ सय ८ वटा मोटरसाइकल परेका छन् ।

सवारी दुर्घटना न्यूनीकरण गर्न लागेका छौँ : प्रहरी
जिल्ला ट्राफिक प्रहरी कार्यालय मोरङका प्रमुख प्रहरी निरिक्षक शिवकुमार पोखरेलले जिल्लाम सवारी दुर्घटना न्यूनीकरण गर्नका लागि विभिन्न गतिविधि सञ्चालन गरिएको जनाकारी दिए । उनले दुर्घटना न्यूनीकरण गर्न होडिङ बोर्डहरु ठाउँ–ठाउँमा राखिएको, जेब्रा क्रसिङ निर्माण, चेक जाँचमा तिब्रता, चालक तथा सहचालकलाई प्रशिक्षण, मापसे जाँच, चेतनामूलकलगायतका कार्यक्रम सञ्चालन गरिएको बताए । उनले भने, ‘जबसम्म आफैं सचेत भएर सवारी साधन चलाइँदैन, तबसम्म दुर्घटना कम हुन गाह्रो छ । हामीले आफ्नो तर्फबाट गर्ने काम गरिरहेकै छौँ ।’

प्रकाशित समय १३:३६ बजे