प्रधानमन्त्री कृषि आधुनिकीकरण परियोजनाका लागि मोबाइल भ्यान प्रयोगशाला खरिदमा भ्रष्टाचार गरेको अभियोगमा अख्तियार दुरुपयोग अनुसन्धान आयोगले खाद्य प्रविधि तथा गुण नियन्त्रण विभागका महानिर्देशक सञ्जिवकुमार कर्णसहित १३ जनाविरुद्ध मुद्दा दायर गरेको छ ।

परियोजनाका लागि प्रयोगशाला मोबाइल भ्यान खरिदमा १२ करोड ४० लाख ४७ हजार ५ सय ५८ रुपैयाँ भ्रष्टाचार गरेको आरोपसहित विशेष अदालतमा भ्रष्टाचार मुद्दा दायर गरिएको हो । अख्तियारले कर्णसहित विभागकै वरिष्ठ खाद्य अनुसन्धान अधिकृत पूर्णचन्द्र वस्ती, शाखा अधिकृत भागिरथ आचार्य, लेखापाल रविता श्रेष्ठ, नायव सुब्बा गुरुदत्त गौतममाथि मुद्दा दायर गरेको छ ।

यस्तै, परियोजना व्यवस्थापन इकाइ खुमलटारका उपसचिव गणेशप्रसाद चालिसे, लेखापाल बालाराम पोख्रेल, तत्कालीन परियोजना निर्देशक नरहरिप्रसाद घिमिरे, वरिष्ठ कृषि इन्जिनियर सरोज अधिकारी, वरिष्ठ योजना अधिकृत तिलकराज चौलागाईं, परियोजना निर्देशक लक्ष्मणप्रसाद पौडेल र वरिष्ठ अनुगमन मूल्यांकन अधिकृत इन्द्रहरि पौडेलविरुद्ध पनि मुद्दा दायुर गरिएको छ । प्रुडेन्ट मेडिटेक इन्टरनेसनलका प्रतिनिधि प्रवीण कुँवरविरुद्ध पनि भ्रष्टाचार मुद्दा दायर गरिएको छ ।

परियोजनाका लागि ४ मोबाइल भ्यान खरिद गर्दा भ्रष्टाचार भएको अख्तियारको निष्कर्ष हो । अख्तियारले विभागका महानिर्देशक कर्णसँग १२ करोड ४० लाख रुपैयाँ बिगो माग दाबी गरेको छ । वरिष्ठ खाद्य अनुसन्धान अधिकृत वस्ती, लेखापाल रविता श्रेष्ठ, नायव सुब्बा गुरुदत्त गौतम र प्रधानमन्त्री कृषिआधुनिकीकरण परियोजनाका व्यवस्थापन इकाइ खुमलटारका उपसचिव गणेश प्रसाद चालिसेसँग पनि १२ करोड ४० लाखका दरले बिगो माग दाबी गरिएको छ ।

इकाइका व्यवस्थापक लेखापाल बालाराम पोखरेलसँग पनि १२ करोड ४० लाख रुपैयाँ माग दाबी गरिएको छ । शाखा अधिकृत भागीरथ आचार्यसँग ४ करोड १३ लाख बिगो माग दाबी गरिएको छ । परियोजना निर्देशक हरिप्रसाद घिमिरे, वरिष्ठ कृषि इञ्जिनियर सरोज अधिकारी, वरिष्ठ योजना अधिकृत तिलकराज चौलागाईसँग ८ करोड २६ लाखका दरले बिगो मागिएको छ ।

अख्तियारले परियोजनाका निर्देशक लक्ष्मणप्रसाद पौडेल, वरिष्ठ अनुगमन मूल्यांकन अधिकृत इन्द्रहरि पौडेलसँग ४ करोड १३ लाख रुपैयाँ बिगो माग दाबी गरेको छ । यस्तै प्रुडेन्टका प्रतिनिधि प्रवीण कुँवरसँग २४ करोड ८० लाख रुपैयाँ माग दाबी गर्दै विशेष अदालतमा मुद्दा दायर गरिएको छ ।

प्रकाशित समय ०८:०१ बजे