सेकेन्ड ह्यान्ड मोटरसाइकल तथा स्कुटरको कारोबार गर्ने व्यवसायीको छाता संगठन नेपाल रिकन्डिसन व्यवसायी संघले दुवै हात गुमाएकी किशोरी मेघा घिमिरेलाई सहयोग गरेको छ । राजधानीमा ‘दुई पाङ्ग्रे सवारीसाधनबाट हुने जोखिम न्यूनीकरण तथा यातायात व्यवस्था सुदृढीकरण’ विषयक अन्तक्र्रियाका अवसरमा संघले घिमिरेलाई ९२ हजार नगद सहयोग गरेको हो ।

कार्यक्रममा काठमाडौं महानगरपालिका–७ का अध्यक्ष शुद्धकुमार डंगोल, यातायात व्यवस्था कार्यालय गुर्जुधाराका शाखा अधिकृत रामचन्द्र दाहाल, प्रहरी नायब उपरीक्षकद्वय राजेन्द्र पोखरेल र प्रदीपकुमार भट्टराई, संघका महासचिव दिनेश महतलगायत संघमा आबद्ध १४० भन्दा बढी रिकन्डिसन व्यवसायीको सहभागिता थियो । उनीहरुले रिकन्डिसन व्यवसायमा देखिएका समस्याको उचित समाधानका लागि पहल गरिदिन सरोकारवाला निकायका प्रतिनिधिको ध्यानाकर्षण गराएका थिए ।

कार्यक्रममा संघका अध्यक्ष बीएन पाठकले रिकिन्डसन व्यवसाय राज्यको एक महत्वपूर्ण अंग भएर पनि उपेक्षामा पारिएको गुनासो व्यक्त गरे । साथै, उनले देशभर रहेका रिकन्डिसन व्यवसायी एक ढिक्का भई संगठित रुपमा आफ्नो आवाज सरोकारवाला निकाय समक्ष राख्नुपर्ने धारणा व्यक्त गरे ।

अधिकांश व्यवसायीले हाल यो व्यवसायमा देखिएका समस्या र तिनको उचित समाधानका लागि स्थानीय तह, प्रहरी र यातायात व्यवस्था कार्यालयले खेल्नुपर्ने भूमिकालगायत विषयमा जिज्ञासा राखेका थिए ।

प्रकाशित समय १६:५७ बजे