साउदी अरबमा पाकिस्तानी सहकर्मीको हत्या गरेको आरोपमा मृत्युदण्डको सजाय सुनाइएका धनुषाका उमेश यादव १४ वर्ष जेल जीवन बिताएर सोमबार घर फर्किएका छन् । विदेशमा जेल जीवन बिताएर यादव घर फर्किंदा सिंगो गाउँ भक्कानियो ।

वैदेशिक रोजगारीका लागि साउदी गएपछि डेढ महिना नबित्दै पाकिस्तानी सहकर्मीको हत्या अभियोगमा जेल परेका उमेश नेपाल आउने कुरा सबैका लागि सपना जस्तै भइसकेको थियो । सपनामै सीमित बनेका उमेश घर आउँदा उनका परिवार र गाउँलेहरु खुसीले अंकमाल गर्दै खुसीले आँसु रोक्न सकेनन् ।

साउदी अरबबाट मृत्यु जितेर घर फर्किएका उमेशलाई गाउँमा भव्य स्वागत गरिएको छ । घर फर्किने आशा त उमेशलाई पनि थिएन । ‘घर आउँछु भन्ने कुरा सपना जस्तै भइसकेको थियो, आशा मरिसकेको थियो, मलाई पुनर्जीवन दिनुहुने सबैलाई धन्यवाद,’ उनले भने ।

पाकिस्तानी सहकर्मीको हत्या गरेको भन्दै उनीविरुद्ध सन् २०१८ मे १५ मा साउदी अदालतले मृत्युदण्ड सुनाएको थियो । त्यसपछि परिवारले समेत उनलाई भेट्ने आशा मारिसकेका थिए । उमेशको मुद्दा चर्चामा आएसँगै सामाजिक अभियन्ता सरोज रायले थालेको पहलले अन्ततः रंग ल्याएको छ ।

प्रकाशित समय ११:४० बजे